Dalin në ankand armët me të cilat Napoleoni tentoi vetëvrasjen, shifrat janë marramendëse

Shitje historike e një thesari kombëtar francez. Dy pistoleta që i përkisnin Napoleon Bonapartit u shitën në ankand për 1.69 milionë euro. Perandori francez dyshohet se u përpoq të vriste veten me këto armë natën e 12 prillit 1814, pas disfatës së ushtrisë së tij nga forcat e huaja që e detyruan të hiqte dorë nga pushteti.

Dy pistoletat u krijuan nga prodhuesi parizien i armëve Louis-Marin Gosset dhe janë të gdhendura në ar dhe argjend, ku paraqesin një imazh të gdhendur të vetë Napoleonit në profil.

Së fundmi Ministria Franceze e Kulturës i klasifikoi ato si një thesar kombëtar dhe ndaloi eksportin e tyre.

Armët mund të largohen nga Franca vetëm përkohësisht dhe qeveria franceze ka 30 muaj kohë për t’i bërë një ofertë blerjeje pronarit të ri, identiteti i të cilit nuk dihet.Në shitje ishin përfshirë edhe kutia origjinale e dy armëve dhe aksesorë të ndryshëm duke përfshirë një bori dhe shufra të ndryshme për ngjeshjen e barutit. Reliket e Napoleonit janë shumë të kërkuara. Një nga kapelat tricorn që u bë pjesë e markës së tij u shit për 1.9 milionë euro në nëntor.

Perandori i madh u kthye në pushtet në 1815 pas mërgimit të tij në ishullin Elba, por u mund në Betejën e Waterloo. Ai vdiq më 5 maj 1821 pas mërgimit të tij të dytë, këtë herë në ishullin e Shën Helenës në Atlantikun e Jugut.

Ankandi u mbajt nga shtëpia Osenat, pranë pallatit të Fontainebleau ku Napoleoni dyshohet se tentoi t’i merrte jetën.