Era e fortë, aktivizohet sërish vatra e zjarrit në Shishtavec

Është aktivizuar një vatër zjarri në afërsi të bjeshkës se Shishtavecit, afër Gurit të Mëngjesit. Vatra është aktivizuar në kodrat pa dalë në bjeshkë, në zonën Çuka, siç e quajnë banorët.

Banorët e zonës dhe shërbimi zjarrfikës bënë të mundur shuarjen e flakëve të shtunën në mbrëmje, por vatra është aktivizuar sërish këtë pasdite pas një ere të fortë.

Në vendngjarje kanë shkuar forcat e policisë, shërbimi zjarrfikës, kryetari i fshatit Shishtavec, kryetari i njësisë administrative Shishtavec dhe drejtori i shkollës me disa banorë, të cilët po neutralizojnë vatrën e zjarrit.

Policia ndodhet në vendngjarje për të identifikuar nëse zjarri është i qëllimshëm apo nga temperaturat e larta.