Goditën me thikë në fytyrë 16-vjeçarin në Korçë, një i arrestuar dhe dy nën hetim

Policia e Korçës ka arrestuar një 21-vjeçar, i cili akuzohet se në bashkëpunim me dy persona të tjerë, ditën e djeshme pas një konflikti jashtë mjediseve të shkollës së mesme “Raqi Qirinxhi”, goditi me mjet prerës një 16-vjeçar. Në pranga ka rënë shtetasi R.Ç.

Gjithashtu, policia ka shoqëruar në mjediset e komisariatit të Korçës edhe dy personat e tjerë të përfshirë në ngjarje, të cilët pasi janë marrë në pyetje nga ana e oficerëve të policisë gjyqësore janë proceduar në gjendje të lire.

Te tre këta shtetas kanë goditur me grushta dhe mjet prerës në fytyrë një 16-vjeçar duke e lënë të plagosur.

Sipas policisë, konflikti ka nisur për motive të dobëta ndërsa ndodhet ende në spitalin rajonal të Korçës duke marrë mjekim, pasi ka dëmtime në fytyrë.

Ky është rasti i disatë në juglindje të vendit ku adoleshentët konfliktohen jashtë ambienteve të gjimnazeve, ndaj e për këtë drejtoria vendore e policisë së Korçës ka shtuar masat e sigurisë në ambientet e jashtë të këtyre shkollave./vizionplus.tv