Manchester United ka prekur fundin

Nga Romario Ismailaj

Trajneri holandez, Erik ten Hag tashmë duket fajtor për situatën e Manchester United, por problemet më të dukshme të “Djajve të Kuq” janë të rrënjosura thellë.

United është sërish në krizë. Skuadra e Erik ten Hag pothuajse arriti të shmangë poshtërimin kundër Bayern Munich në Champions League të mërkurën, por dobësitë e tyre në të gjithë fushën u zbuluan edhe një herë gjatë humbjes 4-3 në “Allianz Arena”.

“Djajtë e Kuq” tani kanë humbur katër nga gjashtë ndeshjet e tyre fillestare në 2023-24, që shënon fillimin e tyre më të keq në një fushatë në të gjitha garat në 36 vjet. Ata gjithashtu kanë pranuar tre ose më shumë gola në tre ndeshje radhazi për herë të parë që nga viti 1978, dhe 14 në përgjithësi, më shumë se çdo skuadër tjetër e Premier League.

Sezoni i parë i Ten Hag në “Old Trafford” u konsiderua i suksesshëm pasi United pasoi fitimin e Carabao Cup duke përfunduar i treti në ligë, por ata kanë shkuar prapa që atëherë, pavarësisht se shpenzuan mbi 200 milionë paund në afatin kalimtar të verës.

Është një vazhdim i ciklit vicioz që asnjë menaxher nuk ka mundur ta thyejë në epokën pas Sir Alex Ferguson, me valët e përkohshme të optimizmit duke i lënë shpejt vendin dëshpërimit dhe zhgënjimit.

Ten Hag sigurisht meriton të njëjtin nivel kritikash që morën Ole Gunnar Solskjaer, Jose Mourinho, Louis van Gaal dhe David Moyes pas rezultateve të fundit, por ai gjithashtu ka luftuar një betejë të humbur në dhomën e zhveshjes.

Nuk ka kulturë të mirë

Ten Hag ka bërë më të mirën për të vulosur autoritetin e tij në skuadrën e United që kur mbërriti në klub, duke lënë pas Cristiano Ronaldo, Harry Maguire dhe Jadon Sancho kur ata nuk arritën të përmbushnin standardet e tij të larta.

“Është detyra ime të kontrolloj standardet”, tha holandezi për qasjen e tij të vijës së ashpër javën e kaluar. “Linjat e rrepta janë ato që më kërkoi klubi sepse nuk kishte një kulturë të mirë përpara se të hyja sezonin e kaluar”.

Problemi është se nuk duket më se po funksionon. Komentet e Ten Hag erdhën pas një grindjeje publike me Sancho, i cili është përjashtuar nga skuadra për herë të dytë për mungesën e supozuar të tij në stërvitje.

Pjesa tjetër e lojtarëve nuk arritën të reagojnë në mënyrë pozitive, duke humbur 3-1 në shtëpi ndaj Brighton.Ky rezultat nuk ishte më befasues sesa humbja e fundit e United nga Bayern.

Shumë e lehtë për të luajtur kundër tyre

United të paktën dështoi me një luftë kundër Bayern-it, por kampionët e Bundesliga-s ishin larg nga më të mirat e tyre. Ata shënuan katër gola, dhe mund të kishin shtuar të paktën një ose dy të tjerë.

Skuadra e Ten Hag është thjesht shumë e lehtë për të luajtur kundër. Ish-trajneri i Ajax tha të njëjtën gjë pas një humbjeje 2-0 jashtë Tottenham-it më 19 gusht, duke u thënë gazetarëve: “Ata (lojtarët) nuk vrapuan. Ose vrapuan në momentin e gabuar, shumë vonë”.

Kjo mungesë vrapimi ishte gjithashtu një nga arsyet kryesore për rënien e United në “Allianz Arena”, dhe në të vërtetë kundër Brighton fundjavën e kaluar. Disiplina e tyre mbrojtëse ka dalë jashtë loje.

Është e dhimbshme të shihet se lojtarët nuk po japin më gjithçka për Ten Hag. Fati i keq me dëmtimet ka luajtur një rol në formën e dobët të United, por kjo nuk është justifikim për askënd.

Pakënaqësi në dhomën e zhveshjes

Ka pasur raporte të rregullta për pakënaqësi prapa skenave në “Old Trafford” vitet e fundit, duke çuar në pikëpyetje nëse disa lojtarë kanë qenë fajtorë për rrjedhjen e informacionit në shtyp.

Lojtarët si Paul Pogba dhe Jesse Lingard u akuzuan se ishin “tradhëtarët” në dhomën e zhveshjes mes periudhës së pafat të Ralf Rangnick si menaxher i përkohshëm, por rrjedhjet kanë vazhduar që nga largimet e tyre përkatëse nga klubi vitin e kaluar.

Në të vërtetë, pas humbjes së fundit të United në Premier League ndaj Brighton, “The Sun” raportoi se katër lojtarë ishin përfshirë në një përplasje të nxehtë. Thuhej se Bruno Fernandes u përball me Scott McTominay, ndërsa dyshja e mbrojtjes Lisandro Martinez dhe Victor Lindelof drejtuan gishtin e fajit te njëri-tjetri për gabimet në mbrojtje.

Klubi thuhet se i ka mohuar këto pretendime, por legjenda e United, Gary Neville është i shqetësuar se situata vetëm do të përkeqësohet. Ai sugjeroi se edhe Ten Hag mund ta kishte sjellë pa dashje edhe veten e tij në këtë ngatërresë, me trajtimin e tij me Sancho dhe Maguire, të cilit iu hoq detyrat e kapitenit në korrik.

“Sa të njohura janë (rastet) Sancho dhe Maguire në dhomën e zhveshjes?”, tha Neville në podkastin e tij të fundit për “Sky Sports”. “Ai ka disa të meta që ne nuk i dimë nga jashtë, çfarë shqetësimi dhe pasigurie po krijohet brenda”.

“Ju keni një lojtar në këtë moment që ndoshta po ndryshon në dhomën e zhveshjes së ekipit të parë, por padyshim që ka përfunduar me akademinë. Ju keni Maguire, i cili ka qenë kapiten i këtyre lojtarëve 12 muaj më parë, tani pothuajse i tjetërsuar si i treti (në hierarki). Ai ka disa situata atje, nuk e di se çfarë dëmi ka”.

“Unë nuk mendoj se Ten Hag do të ndryshojë. Ajo që unë shpresoj për momentin është se është thjesht një fillim i vështirë i sezonit dhe nuk është një përsëritje e asaj që kemi parë më parë. Ne e kemi parë që të bëhet sfiduese për Jose Mourinho, për Louis van Gaal, për David Moyes, për Ralf Rangnick dhe Ole Gunnar Solskjaer. Kështu që unë shpresoj se nuk është fillimi i kësaj”, tha Neville.

Sëmundja e futbollit modern

Ka shumë paralele për t’u tërhequr midis fillimit të sezonit të dytë të Ten Hag te United dhe sezonit të fundit të Solskjaer, i cili e pa atë të humbasë punën e tij pas vetëm 12 ndeshjeve.

Norvegjezi dukej se po shkonte në drejtimin e duhur pas një përfundimi nënkampion në Premier League dhe një paraqitje në finalen e Europa League në sezonin 2021-22, të cilën ai e ndoqi duke nënshkruar me Sancho, Raphael Varane dhe Ronaldo.

Por performancat kolektive më pas morën një pengesë të madhe dhe bordi u detyrua të hynte në veprim pas një humbjeje tronditëse 4-1 kundër Watford.

Nëse Ten Hag nuk është i kujdesshëm, ai mund të ndajë një fat të ngjashëm me Solskjaer, i cili ka folur për mentalitetin e dobët të skuadrës.

“Disa nuk ishin aq të mirë sa perceptimi i tyre për veten”, tha ish-trajneri i United në një intervistë shpërthyese me “The Athletic”. “Kur keni një grup, ju duhet që të gjithë të tërhiqen në të njëjtin drejtim. Kur gjërat nuk shkonin siç duhet, mund të shihje disa lojtarë dhe ego që dolën”.

Solskjaer shtoi: “Disa lojtarë menduan se duhet të kishin luajtur më shumë. Ky është një mëkat i madh për mua. Kur nuk fillova ndeshjet, doja t’i tregoja trajnerit se kishte marrë vendimin e gabuar. Tani, shumë lojtarë nuk janë të tillë. Agjentët dhe anëtarët e familjes hyjnë në kokën e tyre dhe u thonë se janë më të mirë se ata sepse kanë një interes të madh. Është një sëmundje e futbollit modern”.

A është Fernandes kapiteni i duhur?

Fernandes ishte gjithmonë favoriti i qartë për të pasuar Maguire si kapiten i United, pasi kishte mbajtur shiritin në krah për pjesën më të madhe të sezonit 2022-23, ndërsa qendërmbrojtësi duhej të mjaftohej me një vend në mesin e zëvendësuesve.

Playmakeri portugez ka qenë lojtari më i mirë i United që kur iu bashkua klubit nga Sporting CP në janar 2021, dhe është padyshim një fitues i lindur nga natyra. Problemi është se ai shndërrohet në një “fëmijë ngacmues” kur nuk arrin të zgjidhë rrugën e tij.

United lë mendjen pasi pranon gola, dhe në vend që të përpiqet të ngrejë shpirtin e shokëve të tij të skuadrës, Fernandes i mërzit ata më tej. Ai me siguri nuk është njeriu i duhur për të udhëhequr në një krizë.

Në të vërtetë, pasi pa Fernandes-in në mënyrën se si iu drejtua 21-vjeçarit anësor, Facundo Pellistri, pas prishjes së një sulmi premtues kundër Tottenham-it, ish-mbrojtësi i Manchester Cityt, Micah Richards, nuk mund ta fshihte neverinë e tij.

“Ndjehem sikur gjuha e trupit të tij në fushë po shqetëson pjesën tjetër të ekipit dhe thjesht nuk është aspak një pamje e mirë. Është patetike nganjëherë”, tha ai në podkastin e “The Rest is Football”.

Sancho i tha Fernandes-it që të “ndalojë rënkimin” gjatë fitores 1-0 të United në shtëpi kundër Aston Villa sezonin e kaluar, dhe portugezi u kritikua gjerësisht për sjelljen e tij gjatë një humbje tronditëse 7-0 ndaj Liverpool në “Anfield”.

United ka nevojë për një kapiten gjakftohtë tani, jo një kapiten që nuk mund të kontrollojë emocionet e tij. Për këtë arsye, Varane do të kishte qenë zgjidhja më e mirë për këtë rol, pavarësisht nga problemet e tij fizike, duke pasur parasysh përvojën e madhe të ish-yllit të Real Madrid-it kur bëhet fjalë për paraqitjen në nivelin më të lartë.

Fernandes mund të mos jetë përgjegjës për atmosferën toksike në dhomën e zhveshjes, por ai padyshim ka luajtur një rol në përkeqësimin e saj dhe United do të ketë pak shanse për të ndryshuar sezonin e tyre nëse ai nuk ndryshon rrugët e tij.

Ten Hag nuk e ka ndihmuar veten

Ten Hag tani po mëson pse të qenit trajner i United është padyshim puna më e vështirë në futbollin botëror, por ai duhet të marrë pjesën e tij të drejtë të përgjegjësisë për rënien e tyre të fundit. Lojtarët si Lisandro Martinez dhe Casemiro janë bërë të dashur për mbështetësit, por shumica e nënshkrimeve të holandezit kanë qenë zhgënjime të mëdha.

United dha 85 milionë paund për të nënshkruar me Antony nga Ajax sipas fjalës së Ten Hag-ut, dhe anësori brazilian që atëherë ka arritur të shënojë vetëm katër gola në 29 ndeshje në Premier League.

23-vjeçari nuk është gjithashtu i disponueshëm, me klubin që ka rënë dakord që ai të marrë një pushim të pacaktuar për shkak të akuzave shqetësuese për dhunë në familje që janë bërë kundër tij muajt e fundit.

Ten Hag solli Wout Weghorst në huazim në janar për të mbushur boshllëkun e lënë pas largimit të Ronaldo-s, por holandezi e gjeti rrjetën vetëm dy herë në 26 paraqitje në të gjitha garat dhe nuk iu ofrua një kontratë e përhershme.

Dhe më pas vijmë te objektivat e tij të dritares së verës 2023. United nënshkroi Mason Mount për 60 milionë paund, pas sezonit të tij më zhgënjyes me fanellën e Chelsea-t, së bashku me sulmuesin danez Rasmus Hojlund, i cili përfundoi duke kushtuar 73 milionë paund pas përfundimit të negociatave me Atalanta-n.

Në vend që të bënte gjithçka për Harry Kane, Ten Hag i lidhi të gjitha shpresat e tij te një 20-vjeçar që shënoi vetëm nëntë gola në Serie A sezonin e kaluar. Hojlund mund të bëhet një yll i ardhshëm, por Kane do të kishte qenë një gjë e sigurt, siç nënvizon fillimi i tij i shpejtë në Bayern.

Situata është gjithashtu e paditur për Andre Onana-n, me gabimin e tij të pashpjegueshëm që i dha Bayern epërsinë në mesjavë. Mbetet për t’u parë nëse ish-portieri i Inter-it do të jetë një përmirësim i David de Gea-s.

Përtej rekrutimit të tij të dyshimtë, aftësitë menaxhuese të Ten Hag-it po vihen gjithashtu në mikroskop. Ai nuk kishte nevojë të kritikonte publikisht Sancho-n, i cili tani duket i destinuar të largohet nga klubi me potencialin e tij të paplotësuar.

Dhe në përgjithësi, holandezi duket se nuk di të motivojë sërish lojtarët. Tani ka kaq shumë presion mbi Ten Hag që do të shkojë në atë që duhet të ishte një udhëtim rutinë në luftën kundër Burnley-t të shtunën, dhe nuk do të ishte një tronditje nëse ecuria e mjerueshme e United vazhdon.

Vlerat thelbësore të harruara

Ten Hag do ta dijë se nuk e ka luksin e kohës. United duhet të fillojë të fitojë tani, përndryshe ai do të përballet me shkarkimin, kështu funksionon në klubet kryesore.

Por United do të përballej me të njëjtat probleme nën drejtimin e çdo trajneri tjetër. Ata kanë mbetur shumë prapa ekipeve si Manchester City dhe Liverpool për sa i përket sfidës për nderime të mëdha gjatë dekadës së fundit, sepse vlerat thelbësore që mbështetën mbretërimin e lavdishëm të Ferguson-it janë harruar.

Mediokriteti është shpërblyer, me kontrata fitimprurëse të shpërndara për lojtarët që nuk kanë dhënë gjak, djersë dhe lot për stemën. Kjo ka çuar në ego të tepërta dhe mungesë respekti për drejtuesit e ngarkuar me përpjekjen për ta rikthyer klubin në skenën elitare.

Ndërkohë, familja Glazer nuk ka bërë asgjë për të trajtuar rënien e performancës futbollistike në kapacitetin e tyre si pronarë, duke grumbulluar miliona në dividentë nga viti në vit, duke lejuar që themelet e klubit të kalben.

Një sagë e stërzgjatur e blerjes vazhdon të shërbejë si një shpërqendrim i padëshiruar në sfond, pa asnjë ndryshim real që ka gjasa të hyjë në fuqi derisa Glazer më në fund t’ua kalojë kontrollin njerëzve që kujdesen për përparimin në fushë si dhe jashtë saj.

United ngjan më shumë si një telenovelë këto ditë sesa një klub futbolli, dhe heqja qafe e Ten Hag nuk do ta rregullojë këtë.