Rihapet për qarkullimin e makinave Rruga e Arbrit, policia apel drejtuesve të mjeteve

Rruga e Arbrit është e qarkullueshme për makinat tashmë. Policia ka njoftuar se është rihapur kalimi i automjeteve në aksin by pass-Qafë Murrizë, e cila ditën e djeshme u bllokuan për shkak të reshjeve të dendura të dëborës.

Gjithashtu edhe akset rrugore Peshkopi-Maqellarë- Bulqizë; Bulqizë – Ura Vashës-Klos; Klos-Burrel-Ulëz, janë të hapura.

Kujtojmë se mbrëmjen e kaluar, u bë i mundur evakuimi i 50 pasagjerëve që ndodheshin të bllokuar në automjete në bypass-in Qafë Murrizë. Ato u transportuan në destinacionet e tyre nëpërmjet disa makinave të kalueshmërisë së lartë.

Policia thotë këtë të diel se firmat e mirëmbajtjes së këtyre akseve po vijojnë në hedhjen e kripës dhe pastrimin e rrugës nga akulli.

“Policia e Dibrës është e gjitha në gatishmëri të plotë dhe iu bën thirrje të gjithë përdoruesve të rrugës, të shmangin lëvizjet e panevojshme në rrugë,  të tregojnë kujdes maksimal pasi ka prezencë akulli në rrugë,   të përdorin gomat  dimërore dhe mos të qarkullojnë pa mjetet anti-rrëshqitëse”, njoftoi policia.

/a.r