Zjarri në urgjencën e QSUT-së, Prokuroria e Tiranës nis hetimet për “Shkatërrimi të pronës me zjarr”

Prokuroria e Tiranës ka nisur hetimet për zjarrin që shpërtheu në Urgjencën e QSUT-së më 11 shkurt.

Në njoftimin thuhet se Prokuroria ka urdhëruar administrimin e të gjitha provave për të dokumentuar shkakun dhe vlerën e dëmit të shkaktuar dhe ka regjistruar procedimin penal për veprën penale “Shkatërrimi i pronës me zjarr”, parashikuar nga neni 151 i Kodit Penal.

Me administrimin e akteve proceduriale dhe akteve të ekspertimit do të konkludohet mbi shkakun e rënies së zjarrit dhe vatrës fillestare.

Njoftimi i Prokurorisë

Prokuroria pranë Gjykatës së Shkallës së Parë Juridiksionit të Përgjithshëm Tiranë ka regjistruar procedimin penal 1578, dt.29.02.2024 për veprën penale “Shkatërrimi i pronës me zjarr”, parashikuar nga neni 151 i Kodit Penal.

Ky procedim penal, është regjistruar pa persona në hetim, për të hetuar mbi zjarrin e rënë në katin e parë të Urgjencë së Qendrës Spitalore ‘Nënë Tereza’ në orët e para të mëngjesit të 11.02.2024.

Nga ana e prokurorisë është urdhëruar administrimi i të gjitha provave për të dokumentuar shkakun dhe vlerën e dëmit të shkaktuar, si dhe personat përgjegjës për shkaktimin e dëmit.

Me administrimin e akteve proceduriale dhe akteve të ekspertimit do të konkludohet mbi shkakun e rënies së zjarrit dhe vatrës fillestare.