Atentati ndaj Donald Trump, reagon Biden: Lutem për të! S’ka vend për dhunë në Amerikë

Presidenti amerikan Joe Biden  ka reaguar pas sulmit ndaj rivalit të tij Donald Trump.

Shtëpia e Bardhë konfirmoi mbrëmjen e së shtunës se Biden dhe Trump folën në telefon, por nuk dha detaje se çfarë u tha në telefonatë. Një këshilltar i Trump konfirmoi gjithashtu se të dy folën.

Lexo edhe :

Related Posts

Biden u kthye në Shtëpinë e Bardhë të shtunën nga Delaware, ku kishte kaluar fundjavën.

Në komentet e tij publike, presidenti tha se beson se Trump po ecën mirë.

“Nuk ka vend në Amerikë për këtë lloj dhune,” tha presidenti.

“Është e rëndë. Kjo është një nga arsyet pse ne duhet ta bashkojmë këtë vend. Ju nuk mund të lejoni që kjo të ndodhë. Ne nuk mund të jemi kështu. Ne nuk mund ta falim këtë.”

Presidenti tha se tubimi i Trump duhet të ishte në gjendje të zhvillohej në mënyrë paqësore, “pa asnjë problem”.

“Por ideja, ideja se ka dhunë politike apo dhunë si kjo në Amerikë është thjesht e padëgjuar,” tha ai.

Një gazetar e pyeti presidentin nëse beson se ky ishte një atentat.

“Unë nuk di mjaftueshëm për të, kam një mendim, por nuk kam asnjë fakt,” tha presidenti.

“Kështu që unë dua të sigurohem që ne i kemi të gjitha faktet përpara se të bëj ndonjë koment tjetër.”

Shërbimi Sekret deklaroi se Trump është i sigurt pas të shtënave në një tubim në Butler, Pensilvani.

Trump tha  në një postim në rrjetet sociale se një plumb shpoi pjesën e sipërme të veshit të tij të djathtë. Ai u kontrollua në një spital lokal dhe u largua.

Një pjesëmarrës në tubim u vra dhe dy u plagosën rëndë.

Sulmuesi  ka vdekur, tha Shërbimi Sekret. FBI  e identifikoi atë si 20-vjeçarin Thomas Matthew Crook nga Bethel Park, Pensilvani.

“Jam informuar për të shtënat në mitingun e Donald Trump në Pensilvani”, tha Biden në një deklaratë.

“Jam mirënjohës që dëgjova se ai është i sigurt dhe po shkon mirë. Po lutem për të dhe familjen e tij dhe për të gjithë ata që ishin në tubim, ndërsa presim informacione të mëtejshme. Jill dhe unë i jemi mirënjohës Shërbimit Sekret. Nuk ka vend për këtë lloj dhune në Amerikë.”/vizionplus.tv