“Duhet të jesh në burg”, kush është eurodeputetja polake që sulmoi Von der Leyen

Pak para nisjes së votimit për zgjedhjen e Presidentit të Komisionit Evropian, fjalimi i eurodeputetes polake të ekstremit të djathtë Ewa Zajaczowska ka shkaktuar polemika.

Ajo sulmoi verbalisht Ursula von der Leyen duke i thënë: Me atë që ka bërë duhet të jetë në burg, jo në Komision.

Zajacowska në fjalën e saj tha: Zonja Von der Leyen është koha që dikush t’ju tregojë drejtpërdrejt se çfarë mendojnë shumica dërrmuese e qytetarëve për ju. Ju jeni fytyra e Ligjit të Gjelbër Evropian, i cili shkatërron ekonominë evropiane, që shkatërron bujqësinë dhe e çon Evropën në një moçal ekonomik. Ju jeni fytyra e çmendurisë klimatike, e cila po na shtyn ne evropianët të bëhemi gjithnjë e më të varfër. Së fundi, ju jeni fytyra e ligjit të imigracionit. Si mund të mos keni turp të promovoni diçka të tillë si Pakti i Emigracionit, i cili bën që miliona gra dhe fëmijë të ndihen të kërcënuar në qytetet e tyre? Ju jeni përgjegjës për çdo përdhunim, çdo sulm dhe çdo tragjedi të shkaktuar nga emigrantët e paligjshëm, sepse jeni ju që i ftoni këta njerëz në Evropë. Dhe për atë që keni bërë, duhet të shkoni në burg dhe jo në Komisionin Evropian”.

“A e dini se çfarë mendojmë për Marrëveshjen tuaj të Gjelbër Evropiane? A e dini se çfarë mendojmë për Paktin e Emigracionit?” shtoi ajo me tone të larta duke grisur dy copa letre.

Në atë moment ndërhyri Roberta Metzola, e cila tentoi ta ndërpresë duke i thënë se koha e saj kishte mbaruar, ndërsa Von der Leyen e shikonte duke qeshur.

Kush është Eva Zajacowska

34-vjeçarja Zajacowska është mësuese e historisë dhe gazetare, përfaqësuese e shtypit e formacionit të ekstremit të djathtë “Konfederacja Ëolność i Niepodległość” në Poloni.

Ajo filloi karrierën e saj politike në vitin 2014, duke iu bashkuar partisë së ekstremit të djathtë Korwin në qytetin e saj të lindjes Random.

Nga viti 2016 deri në vitin 2023, ajo ka punuar në faqet e internetit si gazetar,e duke mbuluar çështje politike, ekonomike dhe bujqësore.

Nga dhjetori i vitit 2023 u emërua përfaqësuese e shtypit e koalicionit “Konfederacja” dhe fitoi një mandat si eurodeputete në zgjedhjet evropiane të këtij viti./vizionplus.tv