Goditi punonjësin e shërbimit pyjor, arrestohet 41-vjeçari, çfarë u gjet në banesën e tij

Policia e Elbasanit ka arrestuar një 41-vjeçar ditën e djeshme, ku shkak është bërë dhuna ndaj një punonjësi të shërbimit pyjor.

Në banesën e 41-vjeçarit me iniciale V. Rr., banues në Prrenjas u gjetën 400 litra naftë dhe 140 litra vaj lubrifikant për mjete, të dyshuara të kontrabanduara.

“Seksioni për Hetimin e Krimeve Ekonomike dhe Financiare i DVP Elbasan, në bashkëpunim me Komisariatin e Policisë Librazhd, vunë në pranga shtetasin V. Rr., 41 vjeç, banues në Prrenjas.

Ndalimi i 41-vjeçarit u bë pas kallëzimit të një punonjësi të shërbimit pyjor, në bashkinë Prrenjas, se më datë 13.06.2024, ky shtetas e kishte goditur me grushte, për shkak të detyrës.

Në vijim të veprimeve policore për këtë rast, u kryen kontrolle në banesën e 41-vjeçarit, ku u gjetën 400 litra naftë dhe 140 litra vaj lubrifikant për mjete, të dyshuara të kontrabanduara”, thuhet në njoftimin e Policisë.

41-vjeçari akuzohej për veprat penale “Goditjet për shkak të detyrës”, “Kontrabanda e mallrave që paguhet akcizë” dhe “Ruajtja apo depozitimi i mallrave kontrabandë”. /vizionplus.tv