Orban e konfirmon: Të hënën vendosim për anëtarësimin e Suedisë në NATO

Hungaria do të nënshkruajë një marrëveshje me Suedinë për industrinë e mbrojtjes, tha kryeministri Viktor Orban, i cili do të takohet me kryeministrin suedez Ulf Kristerson më vonë sot në Budapest, ndërsa Hungaria përgatitet të ratifikojë përfundimisht anëtarësimin e Suedisë në NATO.

“Ne do të mbyllim të gjitha çështjet në pritje dhe do të nënshkruajmë një marrëveshje për industrinë e mbrojtjes, një marrëveshje serioze duke pasur parasysh madhësinë e Hungarisë, dhe ne gjithashtu do të marrim disa vendime për bashkëpunimin ushtarak”, tha Orban duke folur në stacionin e radios shtetërore, pa bërë të ditur asnjë detaj.

Dy kryeministrat do të mbajnë një konferencë për shtyp sot, ndërsa parlamenti i Hungarisë do të votojë të hënën për të miratuar anëtarësimin e Suedisë në NATO.

“Të hënën parlamenti hungarez do t’i vërë vulën përfundimtare”, tha Orbán për radiostacionin.

Hungaria është i vetmi vend anëtar i NATO-s që ende nuk e ka ratifikuar anëtarësimin e Suedisë, pasi partia qeverisëse e Orban Fidesz e ka vonuar vazhdimisht votimin, duke përmendur kritikat e Suedisë ndaj Hungarisë për sundimin e ligjit. /vizionplus.tv