“Pse më lage me shampanjë”, policia sqaron sherrin me grushta në Palasë, një i plagosur, dy persona në kërkim

Një përleshje me grushta dhe sende të forta ndodhi një natë më parë në një resort në Palasë, ndërsa mbante koncert këngëtari i njohur grek Konstandinos Argiros.

Lidhur me ngjarjen ka reaguar edhe policia, e cila thekson se sherri ka ndodhur për motive të dobëta.

Mësohet se shkak i përplasjes mes burrave ka qenë shampanja, ku palët kanë akuzuar njëri-tjetrin se janë largur.

Sipas policisë i dëmtuar nga sherri ka mbetur 42-vjeçari L.K.

Ndërkohë që policia shpalli zyrtarisht në kërkim 2 prej tyre, Xh.S 28 vjeç nga Tirana dhe G.B 49 vjeç nga Durrësi, por të tjerë janë duke u identifikuar ende.

“Në vijim të njoftimit të dhënë ditën e djeshme për shpalljen në kërkim të shtetasit Xh. S., 28 vjeç, banues në Tiranë, i cili dyshohet se më datë 26.08.2024, në fshatin Palasë, gjatë një konflikti për motive të dobëta, ka goditur me sende të forta shtetasin L. K., 42 vjeç, ju bëjmë me dije se:

Në vijim të hetimeve të kryera nga grupi hetimor dhe këqyrja e pamjeve filmike, një pjesë e pamjeve janë bërë publike në rrjete sociale dhe në disa media, është identifikuar dhe shpallur në kërkim një tjetër shtetas që dyshohet se është përfshirë në këtë konflikt, shtetasi G. B., 49 vjeç, banues në Durrës.

Vijon puna për kapjen e shtetasve të shpallur në kërkim, Xh. S. dhe G. B.

Grupi hetimor, nën drejtimin e Prokurorisë, vijon punën për identifikimin e shtetasve të tjerë të përfshirë në këtë konflikt.

Materialet procedurale shtesë i kaluan Prokurorisë së Vlorës për veprime të mëtejshme“, njoftoi policia.