SHBA: Ka progres në bisedimet për një armëpushim në Gaza

Uashingtoni foli për progres në bisedimet në Kajro që synojnë përfundimin e një marrëveshjeje armëpushimi në Rripin e Gazës, e cila do të shoqërohet me lirimin e pengjeve të mbajtura nga Hamasi në enklavë, në këmbim të lirimit të palestinezëve të mbajtur në qendrat e paraburgimit të Izraelit – ndërkohë që lufta, tashmë në ditën e saj të 323-të, vazhdon pa pushim.

Presidenti i SHBA Joe Biden, i cili po bën presion për një marrëveshje, diskutoi me liderët e dy shteteve arabe që kanë marrë rolin e ndërmjetësve në negociata, presidentin egjiptian Abdel Fattah al-Sisi dhe emirin e Katarit, Sheikh Tamim bin Hamad al Thani.

Shefat e Mossad (spiunazhit) David Barnea dhe Shin Bet (kundërzbulimi) Ronen Barr marrin pjesë në bisedime, një javë pas raundit të mëparshëm, në Doha të Katarit, me pjesëmarrjen e ndërmjetësve.

Sipas shërbimeve të kryeministrit izraelit Benjamin Netanyahu, ata shkuan në Kajro për të “përparuar në një marrëveshje për pengjet” e rrëmbyer dhe dërguar në Rripin e Gazës nga krahu ushtarak i Hamasit gjatë inkursionit të tij të paprecedentë në Izraelin jugor më 7 tetor. Ky sulm ishte shkas për luftën në enklavën palestineze. /vizionplus.tv