Sulmet ukrainase në territorin e pushtuar nga Rusia, 26 të vrarë

Të paktën 26 persona u vranë dhe dhjetëra të tjerë u plagosën të premten gjatë disa sulmeve ukrainase në zonat e kontrolluara nga Rusia në Ukrainën lindore dhe jugore, thanë autoritetet.

Një goditje e dyfishtë synoi veçanërisht fshatin Sandoveh, në rajonin jugor të Khersonit, një pjesë e të cilit është nën pushtimin rus.

Sipas Vladimir Saldo, kreut të autoriteteve pushtuese ruse në rajon, një bombë shkatërroi një dyqan “ku ndodhej një numër i madh vizitorësh dhe punonjësish”, përpara se një raketë HIMARS të godiste zonën, duke vrarë 22 persona dhe duke plagosur 15 të tjerë.

“Në bombardimin e parë, banorët e shtëpive aty pranë vrapuan për të ndihmuar viktimat, por menjëherë pas kësaj mbërriti një raketë HIMARS”, tha ai për mediat ruse.

Saldo denoncoi “vrasjen e tmerrshme të civilëve” të mundësuar nga dërgesat e armëve perëndimore në Kiev dhe goditjen e dyfishtë që synonte “shkaktimin e sa më shumë viktimave”.

Më herët gjatë ditës, katër persona u vranë dhe 57 u plagosën në një sulm nga raketat ATACMS të prodhuara nga SHBA në qytetin lindor të Ukrainës, Luhansk, i cili është gjithashtu nën kontrollin rus.

Sipas Ministrisë ruse të Emergjencave, këto sulme ukrainase shkaktuan kryesisht shembjen e një pallati.

“Numri i përgjithshëm i të plagosurve nga sulmi i sotëm me raketa në Luhansk është 57. Katër prej tyre vdiqën,” tha ministrja lokale e shëndetësisë Natalya Paschenko në mediat sociale.

Sipas kreut pro-rus të rajonit të Luhanskut, Leonid Pasetsnik, dy shkolla të mesme, tre kopshte dhe një kolegj u dëmtuan gjithashtu.

Ministria ruse e Mbrojtjes, nga ana e saj, konfirmoi se “pesë raketa ATACMS të prodhuara nga SHBA” shënjestruan qëllimisht zonat e banuara të qytetit të Luhansk.

Katër prej këtyre raketave u rrëzuan nga sistemet ruse të mbrojtjes ajrore, ndërsa e pesta goditi dy ndërtesa banimi, sipas të njëjtit burim.

Sipas një njoftimi tjetër për shtyp, Ministria ruse e Mbrojtjes njoftoi se kishte pushtuar fshatin Paraskoviivka në rajonin Donetsk të Ukrainës lindore.

Fshati Paraskoviivka ndodhet rreth 30 kilometra në jugperëndim të Donetskut, qyteti më i madh nën kontrollin rus në rajonin me të njëjtin emër.

Trupat ruse kanë fituar terren prej muajsh në Donbass kundër një ushtrie ukrainase me mungesë njerëzish dhe municionesh. Forcat ruse gjithashtu nisën një ofensivë më 10 maj në rajonin Kharkiv të Ukrainës verilindore, duke pushtuar disa lokacione./vizionplus.tv