Sulmi izraelit në Bejrut vret zëdhënësin e Hezbollahut

Zëdhënësi i Hezbollahut, Mohammed Afif u vra pas një sulmi izraelit në Bejrutin qendror, tha të dielën milicia e mbështetur nga Irani.

Një zyrtar i Hezbollahut konfirmoi vdekjen e Afifit.

Afif është i fundit në një varg të gjatë zyrtarësh të Hezbollahut të vrarë që nga fundi i shtatorit, kur  Izraeli filloi bombardimet e tij ndaj bastioneve

Kush ishte Mohammed Afif?

Afif ishte një bashkëpunëtor i ngushtë i Hassan Nasrallah, kreut për një kohë të gjatë të Hezbollahut, i cili u vra në një sulm izraelit në shtator.

Për vite me radhë, Afif ishte përgjegjës për marrëdhëniet mediatike të milicisë së mbështetur nga Irani, duke u ofruar informacion gazetarëve vendas dhe të huaj, shpesh në mënyrë anonime.

Ai iu bashkua Hezbollahut në një moshë të re dhe fillimisht u bë i njohur si drejtor informacioni për kanalin televiziv të grupit Al-Manar kur Hezbollahu dhe Izraeli hynë në luftë në vitin 2006.

Pas vrasjes së Nasrallah, Afif mbajti disa konferenca shtypi në periferitë jugore të Bejrutit, duke përfshirë një muajin e kaluar që duhej të ndërpritet për shkak të kërcënimit të një sulmi izraelit aty pranë.

Izraeli godet caqet në Bejrutin jugor pas urdhrave për evakuim

Ushtria izraelite lëshoi ​​më herët paralajmërime evakuimi për vendet në zonat Hadath, Burj al-Barajneh, Chiyah dhe Haret Hreik, duke thënë se ato ishin afër “vendndodhjeve dhe aseteve të Hezbollahut”. Kjo u pasua nga disa sulme në Bejrutin jugor.

Agjencia Kombëtare e Lajmeve e Libanit raportoi për një sulm të rëndë pranë një spitali në Hadath.

Ushtria e Libanit tha se një sulm izraelit kishte vrarë gjithashtu dy ushtarë dhe plagosur tre të tjerë në Libanin jugor.

“Armiku izraelit shënjestroi drejtpërdrejt një qendër ushtrie” në Mari në zonën Hasbaya të Libanit jugor, tha ushtria libaneze në një deklaratë./vizionplus.tv