WSJ: Musk do të japë 45 milionë dollarë në muaj për të mbështetur fushatën e Trump

Miliarderi Elon Musk planifikon të japë rreth 45 milionë dollarë në muaj për një organizatë që mbështet  fushatën e Donald Trump për t’u rikthyer në Shtëpinë e Bardhë, të cilën sipërmarrës të tjerë të teknologjisë tashmë po e financojnë, raportoi të hënën Wall Street Journal.

Organizata “America PAC”, e cila u themelua në fund të majit, është ndër të ashtuquajturat “super PAC” (“komitete të veprimit politik”), subjekte që nuk janë të lidhura me organizata apo fushata partiake. Ata nuk mund të financojnë drejtpërdrejt një kandidat, por ligji i lejon ata të angazhohen në aktivitete mbështetëse si fushata reklamuese, organizimi i ngjarjeve, etj.

Sipas dokumenteve të publikuara nga FEC, donatorët e America PAC përfshijnë vëllezërit Cameron dhe Tyler Winklevoss, të njohur për grindjet me Mark Zuckerberg. Lista përfshin gjithashtu Douglas Leon, i kompanisë së menaxhimit të kapitalit dhe investimeve Sequoia Capital, një nga më të njohurit në të ashtuquajturën Silicon Valley, dhe Antonio Gracias, i cili ishte një drejtues i Tesla nga 2007 deri në 2021.

Emri i Musk nuk figuron në listën e donatorëve për PAC, i cili kishte mbledhur 8.75 milionë dollarë deri në fund të qershorit.

WSJ shpjegon se emri i tij nuk figuron pasi njeriu më i pasur në botë do të fillojë ta financojë atë këtë muaj. Nëse synimet e tij siç përshkruhen nga gazeta financiare konfirmohen, do të jetë një nga donacionet më të mëdha individuale të bëra ndonjëherë për një fushatë zgjedhore në SHBA./Vizionplus.tv