Aksidentet ajrore me 346 viktima, Boeing përballet me ndjekje penale në SHBA

Departamenti Amerikan i Drejtësisë po shqyrton ndjekjen penale të Boeing për dy aksidente që përfshijnë avionë 737 Max. Aksidentet, njëri në Indonezi në 2018 dhe tjetri në Etiopi në 2019, vranë gjithsej 346 persona.

Gjigandi i linjës ajrore ka shkelur kushtet e një marrëveshjeje të arritur në vitin 2021, e cila e mbrojti kompaninë nga akuzat penale në lidhje me incidentet, tha Departamenti i Drejtësisë i SHBA. Vetë kompania e ka mohuar shkeljen e marrëveshjes.

Prodhuesi i avionëve nuk arriti të “dizenjojë dhe zbatojë një program përputhshmërie dhe etike për të parandaluar dhe zbuluar shkeljet e ligjit të SHBA gjatë gjithë operacioneve të tij,” tha Departamenti i Drejtësisë i SHBA. Boeing tha se pret mundësinë për t’iu përgjigjur Departamentit të Drejtësisë dhe beson se ka respektuar kushtet e kësaj marrëveshjeje.

Si pjesë e marrëveshjes, Boeing pagoi një dëmshpërblim prej 2.5 miliardë dollarësh, ndërsa prokurorët ranë dakord t’i kërkonin gjykatës heqjen e akuzave penale pas një periudhe trevjeçare.

Boeing ka afat deri më 13 qershor për t’iu përgjigjur akuzave të Departamentit Amerikan të Drejtësisë.

Familjarët e viktimave kanë kërkuar veprim penal ndaj kompanisë.

“Ky është një hap i parë pozitiv dhe për familjet, i cili ishte shumë i vonuar. Por ne duhet të shohim veprime të mëtejshme nga Departamenti i Drejtësisë për të mbajtur Boeing përgjegjës”, tha Paul G Cassell, një avokat për familjet e viktimave.