Nesër Bajram, Presidenti Begaj uron besimtarët myslimanë: Zoti ju bekoftë!

Presidenti i vendit, Bajram Begaj uroi sot besimtarët myslimanë në përfundim të muajit të shenjtë Ramazanit.

Ditën e nesërme, besimtarët festojnë Fitër Bajramit.

Përmes një mesazhi të shpërndarë në Facebook, Presidenti Begaj thotë se kjo ditë shenjon shpresën dhe besimin se durimi e përpjekja shpërblehen.

Bajram Begaj: Bajram të bekuar për të gjithë myslimanët, ata që agjëruan dhe ata që nuk mundën, por që me lutje i janë afruar Zotit përgjatë muajit të shenjtë të Ramazanit.

Uroj që ky Fitër Bajram t’ju gjejë me shpirt të pastër, me gëzim, begati e devotshmëri për vepra të shtuara të mira.

Kjo ditë shenjon shpresën dhe besimin se durimi, përpjekja dhe solidariteti njerëzor shpërblehen.

Zoti ju bekoftë dhe ju udhëzoftë në rrugën e drejtë!