.png){kind=spacer}
3 months ago
21
Gjykata e Posaçme kundër Korrupsionit dhe Krimit të Organizuar ka lënë në arrest me burg 1 person ndërsa 4 të tjerë në arrest shtëpie pas hetimeve në lidhje me një grup kriminal që organizonte kalimin e paligjshëm të kufirit me destinacion përfundimtar Shtetet e Bashkuara të Amerikës.
SPAK njoftoi këtë të mërkurë se ka provuar ekzistencën e këtij grupi që ka organizuar kalimin e paligjshëm për disa shqiptarë përmes dokumentacioneve të falsifikuara. Prokuroria e Posaçme thotë se dyshohet se kjo veprimtari kriminale është e organizuar mirë edhe në nivelin transnacional pasi kalimi i paligjshëm drejt SHBA-së rezulton të jetë kryer përmes shteteve Shqipëri-Itali-Spanjë-Meksikë-SHBA.
Mënyra e operimit të grupit
Modus operandi i ndjekur nga personat e përfshirë në këtë veprimtari kriminale konsiston fillimisht në krijimin e kontaktit mes personave të interesuar për të ikur drejt SHBA-ve dhe personit nën hetim L.M. (i lënë nën arrest me burg). Ky i fundit me qëllim kalimin e paligjshëm në kufi kryente në bashkëpunim me shtetas të tjerë veprimet si: prodhimi në kohë të shpejtë i dokumenteve të identifikimit të falsifikuar, prerja e biletave të udhëtimit, pajisja me aparate celularë të rinj dhe numra telefoni sipas shteteve ku kryhet udhëtimi etj.
Shtetasit e interesuar për të ikur drejt SHBA-ve kalonin kufirin shqiptar me pasaportën e tyre shqiptare dhe në aeroportet e Spanjës nga ku kryhej tranziti drejt Meksikës. Aty priteshin nga shtetas të tjerë të përfshirë në këtë aktivitet kriminal, të cilët i pajisin me dokumentin e identifikimit të falsifikuar. E gjitha kjo veprimtari kryhej për jo më shumë se 15-20 ditë dhe çdo person paguante një shumë nga 20 000 (njëzet mijë) Dollarë deri në 45 000 (dyzetë e pesë mijë) Dollarë.
Gjithashtu, në kuadër të veprimeve dhe verifikimeve të kryera nga hetuesit e Byrosë Kombëtare të Hetimit dhe oficerët e Drejtorisë Vendore të Policisë Shkodër, është konstatuar një aktivitet tjetër i paligjshëm i kryer në Pikat e Kalimit Kufitar të Republikës së Shqipërisë me Malin e Zi, nga ana e punonjësve të policisë kufitare.
Ky aktivitet i paligjshëm konsistonte në mos-regjistrimin në sistemet e pikave kufitare të shtetasve shqiptarë, të cilët për shkaqe si: tejkalimi i afatit të qëndrimit në shtetet e BE-së; ndalimi i hyrjes në shtete të ndryshme për shkak të penaliteteve; ose në rastet kur shtetasit janë azilkërkues në vende të ndryshme etj., kërkonin të shmangin në mënyrë të paligjshme regjistrimin e kalimit në kufi.
Pas kryerjes së veprimeve të nevojshme hetimore, analizës së provave të grumbulluara deri në këtë fazë të hetimit Prokuroria e Posaçme paraqiti para Gjykatës së Posaçme kërkesën për caktim mase sigurimi ndaj personave të dyshuar në kryerjen e veprave penale të përshkruara më sipër.
“Gjykata e Posaçme e Shkallës së Parë për Korrupsionin dhe Krimin e Organizuar me vendimin e saj nr. 81, datë 21.07.2024, ka vendosur caktimin e masave të sigurimit personal me karakter shtrëngues “arrest në burg”, parashikuar nga neni 238 i Kodi i Procedurës Penale për personin nën hetim L.M. dhe masën e sigurimit “arrest në shtëpi”, parashikuar nga neni 237 i Kodi i Procedurës Penale për personat nën hetim T.M, B.Ç, E.M dhe G.C”, njoftoi SPAK.
Policia e Shtetit ka ekzekutuar të gjitha masat e sigurimit dhe ka ushtruar kontrolle duke sekuestruar shuma parash (8 mijë euro, 600 mijë lekë, 3 mijë Dollarë, 240 Dollarë kanadez), 17 celularë, 3 makina, USB, dokumente bankare dhe dokumente udhëtimi.
/a.r
English (US) ·