Xhudisti algjerian refuzon të përballet me rivalin izraelit në Lojërat Olimpike

Xhudisti algjerian, Messaoud Redouane Dris, u tërhoq nga ndeshja me xhudistin izraelit, Tohar Butbul, për shkak të luftës gjenocidale në Gaza. Të dy ishin planifikuar të përballeshin me njëri-tjetrin në kategorinë -73 kg, por sfida nuk u zhvillua.

Dris është xhudisti i dytë algjerian që ka braktisur Lojërat Olimpike për shkak të refuzimit të lojës me një garues izraelit. Në vitin 2021, xhudisti algjerian, Fethi Nourine, u tërhoq nga një përballje kundër Butbul në Lojërat e Tokios. Nourine tha në atë kohë se ai e kishte marrë vendimin për shkak të mbështetjes së tij politike për çështjen palestineze. Federata Ndërkombëtare e Xhudos i dha atij një pezullim 10-vjeçar si kundërpërgjigje.

Lojërat Olimpike të këtij viti po zhvillohen mes thirrjeve për ndalimin e pjesëmarrjes së Izraelit. Protesta të shumta janë mbajtur në Francë, por qeveria franceze megjithatë nuk ka pasur asnjë reagim.

“Konkurrenti i Algjerisë është tërhequr nga gara”, u përgjigj Komiteti Olimpik izraelit në një deklaratë për shtyp. “Delegacioni izraelit do të vazhdojë të konkurrojë duke pasur parasysh vlerat olimpike. Ne besojmë se kjo lloj sjelljeje nuk ka vend në botën e sportit.”

/a.r