Amnistia peng i 84 votave, Alibeaj: Jemi të gatshëm të votojmë versionin fillestar, të përfitojnë protestuesit, jo të dënuarit e SPAK

Sekretari i Përgjithshëm i PD-së, Enkelejd Alibeaj dhe Sekretari për Çështjet Ligjore në PD, Indrit Sefa, pasditen e sotme zhvilluan një konferemcë për mediat lidhur me çështjen e amnistisë.

Në një deklaratë për mediat, Alibeaj tha se votat e PD-së do të shkojnë për versionin e parë ku nuk favorizohen të dënuarit nga GJKKO, por favorizohen protestuesit.

“Amendamente që futen tinëz dhe si del për zot njeri që mendojnë të kalojnë nën tym e flakë s’do e kenë votën e përfaqësuesve të PD. Nuk ia këshilloj askujt mekanizmin amoral të peshkimit te votave ne Parlament, aministia duhet të gëzojë legjitimitet nga të gjitha palët, pa prekur vijat e kuqe.

S’kam marrë dhe nuk kërkoj garanci nga askush, skam bërë asnjë negociatë. Qëndrimi ynë është i qartë dhe i thjeshte dhe legjitim, s’jemi nisur nga emra të individualizuar për protestuesit. Votat tona do jenë për versionin e parë të amnistisë plus amendamentet për protestuesit. Ne jemi të gatshëm të votojmë amnistinë e versionit fillestar që ka sjellë qeveria. E kam pyetur publikisht ministrin Manja nëse e kishte diskutuar projekligjin fillestar me Institucionet e reja të drejtësisë, kam marrë një përgjigje pozitive. Pra projektligji kishte marrë dritën jeshile nga SPAK, GJKKO, KLGJ. Dhe e dyta, mos të futen amendamente tinëz në momentin e fundit që nuk janë në të mirën e interesit publik të kësaj amnistie.

Nuk kemi asnjë negociatë me qeverinë. Qëndrimet i kemi publike, votojmë propozimin fillestar të amnistisë dhe të merret parasysh propozimi ynë që nga amnistia të përfitojnë protestuesit. Për këto e japim votën. Nuk votojmë projektligj që amniston të dënuarit nga GJKKO apo persona që janë nën hetim nga SPAK”, tha Alibeaj.