BELGJIKË/ Operacion ndërkombëtar droge kundër organizatës shqiptare, 17 arrestime! Sekuestrohen 100 kg drogë dhe mbi 260 mijë euro

Kërkimet e kryera në Belgjikë dhe në disa vende evropiane, si pjesë e dy hetimeve të kryera në Antwerp, çuan në gjithsej 17 arrestime mëngjesin e së martës.

Hetimet kanë të bëjnë me organizata kriminale shqiptare aktive në sektorin e drogës.

Në Belgjikë u bënë 12 kërkime: në Antwerp, Hoboken, Merksem, Schoten, Saint-Nicolas dhe Wilrijk. Kërkime u bënë edhe në Gjermani, Francë, Itali, Holandë dhe Austri.

Njëmbëdhjetë arrestime në Belgjikë

Njëmbëdhjetë të dyshuar janë arrestuar në Belgjikë dhe gjashtë jashtë vendit, të cilët janë në pritje të ekstradimit të mundshëm drejt Belgjikës.

Pas kërkimeve u sekuestruan 100 kg drogë (kokainë dhe amfetaminë), armë zjarri, kimikate, jelek antiplumb dhe 265,000 euro para cash.

Në shënjestër është një grup kriminal i specializuar në shpërndarjen e sasive të mëdha të drogës që më pas transportoheshin në vende të ndryshme me mjete të pajisura me hapësira të fshehta.

Hetimi nga policia gjyqësore ka të bëjë me një bandë që mësohet se ishte aktive në importin e kokainës nga Amerika e Jugut dhe pastrimin e parave nga trafiku i kokainës./vizionplus.tv