Tatimi për profesionet e lira, opozita dorëzon padi në Kushtetuese, Tabaku: Gjykata të ngrihet në nivelin që i takon, mos bëjë precedentë

Opozita ka dorëzuar një padi në Gjykatën Kushtetuese ditën e sotme për ligjin e tatimit të profesioneve të lira.

Në një komunikim për mediat, Tabaku i kërkoi Kushtetueses që të ngrihet në nivelin që i takon dhe të mos bëjë precedentë me këtë padi.

“Shpresoj që Gjykata Kushtetuese të ngrihet në nivelin që i takon. Të mos bëjë precedentë dhe të japë një të mirë publike. I bëj thirrje kujtdo që kushdo që t’i bashkohet kësaj padie, duke nisur nga avokati i Popullit, që t’i bashkohen grupit parlamentar të PD-së. Ne besojmë te institucionet.”, tha Tabaku.

Deputetja ishte e shoqëruar nga kolegia e saj demokrate Sorina Koti dhe Emilia Koliqi.

Kjo e fundit u shpreh se me këtë ligj qeveria po godet shtresën e mesme në vend.

“Ligji për tatimin mbi të ardhurat, shumë i diskutuar në komisionin e ekonomisë dhe më gjerë. Qeveria në vend të financojë këto aktivitete, përkundrazi i rrit taksat dhe i detyron ato të paguajnë 15 deri në 23% të të ardhurave. Nuk mjaftoi vetëm fiskalizimi që rrënoi bizneset në vend, por vijoi tatimi mbi të ardhurat. Qeveria gjithë kohën pretendon se biznesi ka taksa zero, por në të vërtetë ai rëndoi një kategori shumë të madhe të shërbimeve profesionale.

Nga raporti i BERZH thuhet se administrata është e paaftë, e dobët dhe e korruptuar. Kjo administratë e dobët po i shërben qeverisë dhe po zbaton urdhrat e saj duke zbatuar ligjet që janë kundër të mirës së popullit. E njëjta sjellje është me hartimin e këtij ligji. Ka një goditje të shtresës së mesme dhe të cilët duhet të incentivohen”, u shpreh ajo./vizionplus.tv