Të paktën 20 viktima nga përmbytjet vdekjeprurëse në Brazil

Ekipet e shpëtimit po punojnë pa ndërprerje për të ndihmuar të prekurit e stuhistë së fortë që goditi pjesën juglindore të Brazilit, veçanërisht shtetin e Rio de Zhaneiro , në fund të javës , duke vrarë të paktën 20 njerëz .

Në Petropolis, ku katër persona humbën jetën kur një shtëpi dhe një ndërtesë e vogël u shemb, ekipi i AFP-së dje në mëngjes ndihmoi në shpëtimin e një vajze që kishte mbetur e bllokuar për 16 orë nën rrënojat. Trupi i pajetë i babait të 16-vjeçares u gjet pranë saj.

“Babai e mbrojti heroikisht vajzën e vogël me trupin e tij dhe ajo shpëtoi (…). Ndjejmë dhimbje, por jemi mirënjohës për këtë mrekulli”, tha për AFP Luis Claudio de Souza, 63 vjeç, një fqinj i familjes.

Ndërkohë mijëra qytetarë nuk ishin në gjendje të gjenin strehim për shkak të motit të keq, tha presidenti brazilian Luiz Inacio Lula da Silva në një mesazh të postuar në Platformën X.

Tragjedi të tilla “intensifikohen me ndryshimet klimatike”, kujtoi presidenti brazilian, në një vend që ka qenë vazhdimisht në mëshirë të fatkeqësive natyrore.

Dyqind e dyzet e një njerëz vdiqën në qytetin turistik të Petropolis në vitin 2022 për shkak të shirave të dendur.

Lula shprehu gjithashtu ngushëllimet e tij për të afërmit e viktimave dhe siguroi se qeveria po punon me autoritetet lokale për të “mbrojtur, parandaluar dhe riparuar dëmet nga përmbytjet”.

Situata “kaotike”

Guvernatori i shtetit Espirito, Renato Casagrande, përshkroi nga ana e tij një “situatë kaotike” në qytetin Mimozo do Sul, në periferi veriore të Rios, ku nuk dihet numri i saktë i viktimave të mundshme nga moti i keq.

Në pamjet ajrore të regjistruara ditën e djeshme dhe të transmetuara nga shërbimi zjarrfikës, rrethe të tëra të qytetit duken të zhytura nën ujërat me baltë, ndërsa duken vetëm çatitë e shtëpive. Në fotot e tjera të postuara në rrjetet sociale, disa automjete, përfshirë një zjarrfikës, janë përfshirë nga përrenjtë e baltës.

Rrugët e Petropolis u kthyen në lumenj, me guvernatorin e shtetit të Rios, Claudio Castro, të premten që e quajti situatën “kritike” dhe e shpalli qytetin gjendje të jashtëzakonshme.

Dje në mëngjes, dhjetëra ushtarë dhe zjarrfikës, të ndihmuar nga qentë, po punonin pavarësisht shiut të rrëmbyeshëm, raportoi AFP.

Rreth 90 persona janë shpëtuar që nga e premtja dhe shkollat publike janë kthyer në strehimore, sipas Komitetit të Menaxhimit të Emergjencave të ngritur nga qeveria dhe forcat e shpëtimit.

Erërat e forta dhe shiu i dendur goditën bregdetin pranë Sao Paulos, ku dy fëmijë u plagosën të premten dhe mbeten në spital.

Stuhia e fortë pason një valë të nxehti në rajon, e cila pa temperaturat 62.3 gradë Celsius në Rio de Zhaneiro javën e kaluar./Vizionplus.tv/