Aksident tragjik në Indi, të paktën 18 të vdekur

Të paktën 18 persona u vranë dhe 19 u plagosën në veri të Indisë sot kur një autobus u përplas me një cisternë qumështi.

“Autobusi goditi pjesën e pasme, 18 persona u vranë, 19 të tjerë u plagosën”, tha për AFP Zulfiqar Ali, nga zyra e shefit të policisë lokale.

Autobusi po shkonte për në kryeqytetin e Indisë, Nju Delhi, nga shteti lindor indian i Biharit, raportoi televizioni NDTV.

Aksidentet rrugore janë të shpeshta në Indi, ku statistikat flasin për 168,000 vdekje në vitin 2022.

Në maj, të paktën 21 njerëz u vranë dhe më shumë se 50 u plagosën në Kashmirin Indian kur një autobus rrëshqiti nga një rrugë malore dhe u përplas në një shkëmb.