Anëtarët e NATO-s pranojnë të financojnë Ukrainën me 40 miliardë euro

Aleatët e NATO-s kanë rënë dakord të financojnë Ukrainën me 40 miliardë euro (43 miliardë dollarë) vitin e ardhshëm, deklaruan për Reuters dy diplomatë të Evropës Perëndimore, një javë para se liderët e aleancës të takohen në Uashington.

Sekretari i Përgjithshëm i NATO-s, Jens Stoltenberg, u kishte kërkuar aleatëve të bënin një angazhim shumëvjeçar për të ndihmuar ushtarakisht Kievin në të njëjtin nivel me ndihmën e vitit 2022, kur Rusia nisi pushtimin e plotë të Ukrainës.

Ndërsa vendet anëtare nuk e mbështetën kërkesën fillestare të Stoltenberg për një premtim të tillë shumëvjeçar, pakti përfshin një dispozitë për të rivlerësuar kontributet e aleatëve në samitet e ardhshme të NATO-s, sipas një diplomati.

Aleatët vendosën gjithashtu të kenë dy raporte gjatë vitit të ardhshëm për të përcaktuar se cili vend do të furnizojë Ukrainën, tha diplomati, për të përmbushur kërkesat për më shumë transparencë mbi ndarjen e barrës në aleancë.

Shtetet anëtare “do të synojnë ta përmbushin këtë zotim përmes kontributeve proporcionale”, thuhej në marrëveshje.

Premtimi financiar është pjesë e një pakete më të gjerë të Ukrainës që liderët e NATO-s do të bien dakord kur të mblidhen për samitin e Uashingtonit nga 9 deri më 11 korrik./vizionplus.tv