Basha nga Fieri: PD do të ndërtojë Shqipërinë e shqiptarëve

Kryedemokrati Lulzim Basha ka qenë i pranishëm ditën e diel në qytetin e Fierit ku po zgjidhen strukturat e reja drejtuese të kësaj force politike.

Gjatë fjalës së tij Basha theksoi se ky “Kuvend është shprehja e gjallë dhe e vërtet që demokratët e Fierit kanë bërë në këto 2 vite të vështira të PD”.

Ai theksoi se PD dhe demokratët do të ndërtojnë së bashku Shqipërinë e shqiptarëve, teksa shtoi se kjo parti mund të zgjidhë problemet dhe të japë përgjigje pyetjeve të shumicës.

“Në programin tonë qeverisës, një pikë e rëndësishme është që në 4 vjeçarin e parë të qeverisjes tonë, ish të përndjekurit politik do jenë në qendër të vëmendjes. Zotimi ynë ndaj ish pronarëve do të bëhet realitet. Shlyerja brenda një kohe 10 vjeçare të ish pronarëve. Aty ku 7501 njeh zaptuesin, pronarët real do zë shpërblehen me vlerën e tregut. Pronarët dhe të përndjekurit përbëjnë gjysmën e popullsisë. Kaosi me titujt e pronës kanë qenë instrumentet e korrupsionit të qeveritarëve. Me anë të reformës për pronat, PD do të mundësojë në dy vitet e para zgjidhjen e pasigurisë për pronën. Problemi kryesor që kanë shqiptarët sot është ekonomia, papunësia, rritja e kostove të jetesës, shëndetësia, arsimi. Dua t’u them se PD shumë shpejt do të paraqesë një program që do t’i përgjigjet demagogjisë me fakte, t’i përgjigjemi kotësisë me program, me projekte konkrete për hallet e sipërmarrjes, pensionistëve, arsimtarëve, të rinjve”, tha Basha.

Në vijim të fjalës së tij ai theksoi se në këtë Kuvend demokratët do të nxjerrin një ekip të ri që do të sjellë një frymë të re politike, që do të ngrihet mbi interesat e vogla dhe ato personale.

“Sot me vendimmarrjen tonë, do të nxjerrim ekipin që do të angazhojë PD në një kulturë të re politike. Për t’i bindur qytetarët që duan ndryshimin se e vetmja rrugë për zgjidhjen e problemeve, është Partia Demokratike. Jam i bindur që në këtë proces do të drejtoheni jo nga interesa të vogla. Se nëse do të ishte kështu, sot nuk do të ishit në këtë sallë. Me të njëjtin besim që mbajtët PD gjallë, jam i bindur se me këtë frymë do t’i drejtoheni edhe qytetarëve që kërkojnë zgjidhje. Pyetja e parë kryesore që shqiptarët kanë, është: kush është platforma për ta bërë këtë. PD vizionin e saj e ka kthyer në realitet në parlamentin shqiptar, me propozimin për reformën zgjedhore. Listat e hapura, kush ka më shumë vota të shkojë në parlament. Barazia e votës, që votat e fierakëve të peshojnë njësoj me kuksianët, dibranët, korçarët, etj. Votimi elektronik që do të zgjidh vonesat e proceseve të numërimit. Dhe e fundit vota e diasporës, që në vitet e fundit është rritur tej mase për shkak të largimeve masive dhe që ka peshën e saj. Cili propozim nuk është i mirë? Ndaj duhet ta imponojmë në debatin publik këto propozime jetike dhe që pakica që është në pushtet të ulet e t’i marrë parasysh. Ta vëmë me shpatulla pas murit, duan apo nuk duan listat e hapura, duan apo nuk duan barazinë e votës, duan apo nuk duan votimin elektronik, duan apo nuk duan votën e diasporës”, tha kreu i PD.