Begaj dekretoi ligjin për “Zonat e Mbrojtura”, reagon Bardhi

Kreu i grupit parlamentar të PD Gazmet Bardhi ka reaguar pas dekretimit të ligjit për “Zonat e Mbrojtura” nga presidenti Bajram Begaj.

Sipas Bardhit, me këtë dekret, Begaj humbi mundësinë të jetë shërbyes i interesit publik.

Lexo edhe :

Related Posts

Ky ligj shtoi Bardhi, shkatërron zonat e mbrojtura dhe Begaj u vu në shërbim të interesave klienteliste të Ramës.

“Përsëri sot Presidenti i Republikës humbi mundësinë të jetë shërbyes i interesit publik. Dekretimi prej tij i ligjit që shkatërron zonat e mbrojtura është tjetër provë se për Kreun e Shtetit në çdo rast prevalon interesi korruptiv i klientëve të Edi Ramës dhe jo interesi i qytetarëve shqiptar.

Kurrë në më shumë se 30 vjet Shqipëria nuk ka patur një President që nuk guxon të ngrihet në lartësinë e detyrës, si garant i Kushtetutës, ku përcaktohet se identiteti kombëtar dhe trashëgimia kombëtare janë baza e këtij shteti, i cili ka për detyrë t’i respektojë dhe t’i mbrojë”, shkruan Bardhi.

Kreu i grupit parlamentar të PD theksoi se Begaj që nga emërimi në detyrë ka kthyer për rishqyrtim vetëm një ligj, ndërsa ato ligje që prekin interesat e qytetarëve i ka dekretuar lehtësisht.

“Që nga emërimi në detyrë Presidenti i Republikës ka kthyer për rishqyrtim vetëm një ligj, që lidhej me interesat personale të tij. Ndërkohë një shumësi ligjesh, që prekin interesin e qytetarëve, që bien ndesh me Kushtetutën, ligje me porosi klienteliste apo korruptive, janë miratuar me kokën ulur nga Presidenti i Republikës, duke u vetëshpallur si degë e ekzekutivit dhe duke humbur rolin e tij kushtetues.

Shqipëria ka nevojë urgjente për rikthimin e balancës mes pushteteve, duke nxitur kontrollin e ndërsjellt mes tyre. Rikthimi i mekanizmave demokratike dhe mbrojtja e demokracisë është më i domosdoshëm se kurrë”, u shpreh Bardhi.

Ligji për “Zonat e Mbrojtura” u votua në Kuvend me 72 vota pro në seancën parlamentare të 22 shkurtit, por u kundërshtua fort nga opozita.