“Fëmijët e sëmurë nuk mund ta përballojnë urinë”, dhjetëra persona largohen nga Rripi i Gazës për të marrë ndihmë mjekësore

Dhjetra fëmijë të sëmurë dhe të plagosur, duke përfshirë 20 pacientë me kancer, janë evakuuar nga Gaza përmes vendkalimit Kerem Shalom, të parët që largohet që kur Izraeli filloi ofensivën e tij në Rafah muajin e kaluar.

68-të u transferuan në Kajro, Egjipt, të enjten, thonë autoritetet izraelite. COGAT, agjencia izraelite përgjegjëse për miratimin e ndihmës në Gaza, koordinoi kalimin së bashku me ushtrinë izraelite, SHBA-në, Egjiptin dhe Organizatën Botërore të Shëndetësisë (OBSH).

Lajmi solli një moment lehtësimi për prindërit, fëmijët e të cilëve nuk kishin qenë në gjendje të merrnin kujdesin shëndetësor.

“Ishte një kohë e vështirë për ne në Gazën veriore, nëntë muaj rraskapitje, zhvendosje,” tha Samira Al-Saeedi, vajza gjashtë vjeçare e së cilës Jouri u evakuua në fillim të kësaj jave.

“Njerëzit filluan të vjedhin vetëm për të ngrënë… Fëmijët e sëmurë nuk mund ta përballojnë urinë.”

Pamjet e CNN nga Spitali Nasser të martën treguan një tjetër të evakuuar, një paciente pesëvjeçare me kancer në gjak, Yasmin, duke u përpëlitur nga dhimbja.

“Ajo po vuan dhe po lëviz mes spitaleve duke marrë trajtime gjaku… Çdo ditë ndjen më shumë dhimbje”, tha nëna e saj Umm Ubaida.

“Ajo është jashtëzakonisht e lodhur. Ajo nuk mund të presë më.”

Shefi i OBSH-së Tedros Adhanom Ghebreyesus përshëndeti evakuimin të premten. Ai bëri thirrje për rritje të evakuimeve “nëpërmjet të gjitha rrugëve të mundshme”.

Por ndërsa rrethimi i Izraelit vazhdon, dhe rreziku i urisë rritet, zyrtarët palestinezë kanë paralajmëruar se operacioni ishte “një pikë në oqean” krahasuar me qindra fëmijë të sëmurë që janë ende të bllokuar në enklavën e shkatërruar.

Më shumë se 25,000 njerëz të sëmurë kërkojnë trajtim urgjent jashtë vendit, sipas Ministrisë së Shëndetësisë në Gaza. Midis tyre janë 980 fëmijë me kancer, përfshirë 250 pacientë që mund të përballen me vdekje, njoftoi ministria të premten. Fushata ushtarake e Izraelit ka varfëruar sistemin mjekësor dhe ka zbrazur furnizimet ushqimore.

Izraeli këmbëngul se nuk ka “asnjë kufi” në sasinë e ndihmave që mund të hyjnë në Gaza, por agjencitë e të drejtave të njeriut paralajmërojnë se regjimi i tij i ngurtë i inspektimit të kamionëve, kufizimet e qëndrueshme në vendkalimet tokësore dhe fushata e pamëshirshme e bombardimeve do të thotë se kalimi vështirësohet.

Izraeli nisi ofensivën e tij ushtarake në Gaza pas sulmeve të 7 tetorit të udhëhequr nga Hamasi në jug të Izraelit, në të cilat u vranë të paktën 1200 njerëz dhe më shumë se 250 të tjerë u rrëmbyen.

Sulmet izraelite në Gaza kanë vrarë 37,718 palestinezë dhe kanë plagosur 86,377 persona të tjerë, sipas zyrtarëve shëndetësorë të Gazës./vizionplus.tv