Gjendet e vdekur 36-vjeçarja brenda stomakut të pitonit

Një grua u gjet e vdekur në barkun e një pitoni që e kishte gëlltitur të gjithën, tha sot policia në provincën indoneziane të Sulawesi-t Jugor sipas mediave të huaja.

Gruaja 36-vjeçare u zhduk pasi doli nga shtëpia e saj të martën në mëngjes për të blerë ilaçe për fëmijën e saj të sëmurë, tha policia. Të afërmit e saj të shqetësuar shkuan ta kërkonin.

Burri i saj zbuloi këpucët në tokë rreth 500 metra larg shtëpisë së tyre në fshatin Sitemba.

“Menjëherë pas kësaj, ai vuri re një zvarranik rreth dhjetë metra larg shtegut. Zvarraniku ishte ende gjallë”, tha për AFP shefi i policisë lokale Indul.

Burri dyshoi se çfarë kishte ndodhur pasi vuri re barkun “shumë të madh” të pitonit.

Më pas ai thirri fshatarët për ta ndihmuar të hapte stomakun e zvarranikut dhe më pas u shfaq trupi i gruas së tij.

Incidente të tilla janë jashtëzakonisht të rralla, por disa njerëz kanë vdekur në Indonezi vitet e fundit pasi janë gëlltitur nga pitonët.

Në fillim të qershorit, një grua 45-vjeçare u gjet e vdekur në stomakun e një pitoni rreth pesë metra të gjatë./vizionplus.tv