Hamasi tregon kushtet për armëpushim, Izraeli dërgon delegacion për bisedime

Izraeli njoftoi të enjten se së shpejti do të dërgonte një delegacion në Katar si pjesë e një përpjekjeje për të rifilluar bisedimet indirekte mbi një marrëveshje në Rripin e Gazës që do të përfshinte lirimin e pengjeve të mbetura, ndërsa Hamasi tha se ishte i hapur për bisedimet e armëpushimit në enklavën palestineze, e cila ka pësuar shkatërrim masiv pas më shumë se një viti lufte.

Negociatat më të fundit indirekte nën kujdesin e ndërmjetësve – Katari, Egjipti, Shtetet e Bashkuara – për të përfunduar një marrëveshje armëpushimi në Rripin e Gazës, shoqëruar me lirimin e pengjeve, u mbajtën në gusht dhe dështuan, si disa përpjekje të ngjashme më parë.

Në të njëjtën kohë, Izraeli vazhdon sulmin e tij kundër Hezbollahut në Liban: pati një seri të re bombardimesh në periferitë jugore të Bejrutit gjatë natës, ndërsa tre gazetarë u vranë në një sulm izraelit në Hasbaya, në pjesën juglindore të vendit, sipas për Agjencinë Kombëtare Libaneze të Lajmeve.

Bisedimet e reja u njoftuan disa ditë pas vdekjes së liderit të Hamasit, Yahya Shinwar, i cili u vra në një betejë me forcat izraelite më 16 tetor në enklavën jugore palestineze, dhe ndërsa Izraeli është nën presion për t’i dhënë fund luftës së Gazës kundër Hamasit dhe në Liban kundër Hezbollahut, dy lëvizje të mbështetura nga Irani, armiku i tij i betuar.

Ushtria izraelite vazhdon operacionet e saj në Rripin e Gazës të rrethuar dhe të shkatërruar, mbi të gjitha në veri, ku të paktën 770 palestinezë janë vrarë në 19 ditë, sipas mbrojtjes civile.

Hamasi “u shfaq i gatshëm të binte dakord për një ndërprerje të luftimeve”, por kërkon që Izraeli “të angazhohet për një armëpushim”, për “tërheqjen” e trupave të tij nga enklava dhe për një “marrëveshje serioze për shkëmbimin” e pengjeve të rrëmbyer në 7 tetor 2023 dhe që atëherë kanë mbetur në Rripin e Gazës, me të burgosur palestinezë në burgjet izraelite, tha një zyrtar i lëvizjes.

Këto kushte, të cilat ishin paraqitur në negociatat e mëparshme indirekte, ishin refuzuar nga qeveria izraelite. /vizionplus.tv