Madridi dhe BE-ja po punojnë për një plan emergjence për të zbutur krizën e migracionit

Qeveria spanjolle po punon për të dalë me një “plan strategjik” të përkohshëm për të lehtësuar krizën e rëndë të migracionit në Ishujt Kanarie dhe enklavën spanjolle të Ceutës në Afrikën e Veriut.

Ndërkohë, Agjencia Evropiane e Rojës Kufitare dhe Bregdetare (Frontex) ka inkurajuar Madridin që të kërkojë zyrtarisht ndihmë për të kontrolluar urgjencën humanitare.

Ministrja spanjolle për Rininë dhe Fëmijët,  Sira Rego njoftoi në një vizitë në Ceuta të mërkurën (4 shtator) se ekzekutivi progresiv i kryeministrit Pedro Sánchez (PSOE/S&D) po harton aktualisht një plan emergjence dhe BE-ja pritet të ndihmojë për realizimin e këtij plani.

Sipas Rego, është “një plan strategjik për të cilin po punohet me BE-në dhe institucionet evropiane për të kërkuar burimet financiare që duhen për të zbatuar ato plane emergjente.”

Në afat të shkurtër, qeveria spanjolle synon të eksplorojë “mundësinë e zbatimit të programeve evropiane që mirëpresin dhe mbrojnë fëmijët azilkërkues” dhe të zbatojë një politikë të “pritjes detyruese dhe mbështetëse të fëmijëve në territorin e BE”, tha Rego.

Shifrat e fundit zyrtare zbuluan se ardhjet e parregullta të emigrantëve nga Afrika arritën nivele rekord në Spanjë në dy javët e para të gushtit, me rritje prej 126% në Ishujt Kanarie dhe 143% në Ceuta.

Një numër i madh i këtyre migrantëve të parregullt vijnë nga Mauritania dhe rajoni i Sahelit, ku përshkallëzimi aktual i dhunës po zhvendos mijëra njerëz dhe po paraqet sfida të mëdha sigurie për BE-në.

Një sfidë e madhe e paraqitur për autoritetet lokale është se qendrat e pritjes së emigrantëve në Ishujt Kanarie dhe Ceuta  janë të mbipopulluara, duke i detyruar ata të ngrenë tenda dhe akomodime të tjera të përkohshme.

Kriza e migracionit është kthyer gjithashtu në një fushë beteje politike të diskutueshme  midis qeverisë dhe Partisë Popullore Spanjolle (Partido Popular/EPP), forca kryesore e opozitës, e cila  akuzon PSOE për mungesë të një politike të vërtetë migracioni.

Paralajmërim nga Frontex dhe kritika nga presidenti i Ishujve Kanarie 

Një zë kritik u dëgjua të enjten (5 shtator) kur presidenti i qeverisë rajonale të Ishujve Kanarie, Fernando Clavijo, i tha El País në një intervistë se ndihej “i mashtruar nga PSOE .”

Ndërkohë, drejtori ekzekutiv i Frontex Hans Leijtens bëri thirrje këtë javë për vullnet politik nga qeveria spanjolle, si dhe burime financiare dhe ligjore, në mënyrë që agjencia të mund të bashkëpunojë shpejt me Madridin në këtë krizë, raportoi partneri i Euractiv EFE.

Leijtens shtoi se Frontex aktualisht është duke negociuar programet e saj të bashkëpunimit me partnerët e BE-së për vitin 2025 dhe kujtoi se vendet anëtare duhet së pari të kërkojnë zyrtarisht ndihmën e agjencisë.

“E kam parë me sytë e mi. Kam qenë në qendra pritëse (për emigrantë në Kanarie), kam qenë në bregdet. Unë kam folur me Guardia Civil (policinë e militarizuar). Unë jam plotësisht i vetëdijshëm për këtë problem, por gjithçka fillon me një kërkesë të qeverisë spanjolle”, paralajmëroi zyrtari i lartë evropian.

Në mënyrë të ngjashme, Clavijo i dërgoi një letër javën e kaluar Presidentes së Komisionit Evropian, Ursula von der Leyen, duke e ftuar atë të vizitojë Ishujt Kanarie për të parë se si autoritetet lokale dhe OJQ-të po merren me urgjencën.

Përveç kësaj, ai kërkoi të mërkurën (4 shtator) të paraqitej para Parlamentit Evropian për të shpjeguar situatën dhe për të kërkuar ndihmë urgjente shtesë nga BE, raportoi EFE.

Një “mollë sherri” midis PP dhe PSOE është propozimi i kësaj të fundit për të ndryshuar urgjentisht Ligjin aktual të Emigracionit ( Ley de Extranjería ) për ta bërë të detyrueshëm pritjen e të miturve emigrantë të pashoqëruar në 17 komunitetet autonome të Spanjës.

Pritja e një kuote të kufizuar të të miturve emigrantë në komunitetet autonome në të cilat PP dhe VOX qeverisin në koalicion shkaktoi një krizë të hidhur midis dy partive para verës dhe çoi në një prishje të pjesshme të marrëveshjeve lokale mes tyre./vizionplus.tv