Mbeti i vdekur një person, 21 u plagosën në SHBA/ Detaje nga të shtënat gjatë paradës së Super Bowl

8 months ago 8

Një tjetër episod të shtënash masive tronditI SHBA-në një ditë më parë. Agresioni këtë radhë ndodhi gjatë një parade të organizuar pas fitores së kampionatit të futbollit amerikan nga ekipi Kansas City Chiefs.

Një person mbeti i vrarë dhe të paktën 21 të tjerë janë lënduar, 7 prej të cilëve rëndë, kur mbi njerëzit e mbledhur aty u hap zjarr.

Shefja e policisë, Stacey Graves, tha se janë duke hetuar motivin e të shtënave, e pohoi se lidhur me incidentin janë arrestuar tre persona.

Sipas raportimeve, të shtënat ndodhën afër një parkingu ku një turmë e madhe njerëzish ishin mbledhur, teksa lojtarët dhe personeli i ekipit fitues të kampionatit amerikan në futboll, i njohur si Super Bowl, u mblodhën për të festuar fitoren.

“Një tragjedi të tillë, nuk e kemi përjetuar kurrë më parë në qytetin e Kansasit”, tha kryetari i bashkisë, Quinton Lucas, përmes një postimi në platformën X. Ai shtoi se asnjë nga anëtarët e ekipit të futbollit dhe stafit nuk kanë pësuar lëndime.

Kansas City Chiefs po festonin fitoren e tyre të së dielës ndaj San Francisco 49ers, përballja me të cilët ndodhi në Las Vegas. Ky është kampionati i dytë me radhë që City Chiefs fitojnë dhe i treti në pesë sezone. Përmes një deklarate të përbashkët, pjesëtarët e ekipit shprehën keqardhjen e thellë për incidentin e regjistruar gjatë paradës, të cilin e përshkruan si “një akt dhune të pakuptimtë”.