Mbretëria e Bashkuar do të dërgojë qindra raketa të tjera në Ukrainë

Mbretëria e Bashkuar do të dërgojë 650 raketa shtesë me rreze të shkurtër veprimi në Ukrainë për të ndihmuar në luftën e saj kundër forcave pushtuese ruse.

Paketa e re e ndihmës vjen pasi presidenti ukrainas Volodymyr Zelensky bëri një tjetër lutje për mbështetje të mëtejshme nga aleatët në një samit të mbrojtjes në bazën ajrore Ramstein në Gjermani.

Zelensky u tha gazetarëve se nevojitej më shumë ndihmë ushtarake për të “përzënë forcat ruse nga toka jonë”, veçanërisht në rajonin lindor të Donetskut të vendit.

Gjithashtu në samit u bashkua edhe Sekretari i Mbrojtjes i Mbretërisë së Bashkuar, John Healey, i cili do të shpallë paketën prej 162 milionë paund.

Healey tha përpara samitit se paketa e re e Mbretërisë së Bashkuar do t’i jepte një “nxitje të rëndësishme” mbrojtjes ajrore të Ukrainës dhe tregoi se qeveria po “përforconte” mbështetjen e saj.

Në korrik, kryeministri i Mbretërisë së Bashkuar Sir Keir Starmer u zotua të dërgojë 3 miliardë paund në vit në Ukrainë për aq kohë sa të jetë e nevojshme.

Që nga fillimi i pushtimit të Rusisë në shkurt 2022, Britania e Madhe ka dërguar një total prej 12.7 miliardë paund, përfshirë 7.6 miliardë paund mbështetje ushtarake.

Zelensky mbërriti në Ramstein të premten në mëngjes, vetëm disa ditë pasi një sulm me raketa ruse në qytetin e Poltava në Ukrainën qendrore vrau të paktën 51 persona.

Në thirrjen e tij drejtuar aleatëve ndërkombëtarë, ai tha: “Është e rëndësishme që çdo paketë mbështetëse që shpallet të vihet menjëherë në punë në fushën e betejës pa asnjë vonesë.

Shtetet e Bashkuara, mbështetësi më i madh i Kievit, ka njoftuar gjithashtu se do të sigurojë 250 milionë dollarë të tjera ndihmë ushtarake për Ukrainën./vizionplus.tv