Media izraelite: Operacioni në Rafah do të fillojë shumë shpejt

Izraeli është gati të dërgojë trupa në Rafah, qyteti i Gazës që e konsideron bastionin e fundit të Hamasit, raportuan mediat izraelite të mërkurën.

Në të njëjtën kohë, ato folën për përgatitjet për largimin e civilëve palestinezë të zhvendosur, të cilët janë strehuar atje për shkak të luftës që po vazhdon prej gjashtë muajsh.

Sulmi në Rafah, i shtyrë për disa javë mes mosmarrëveshjeve me Uashingtonin, do të ndodhë “shumë shpejt”, njoftoi gazeta Israel Hayom, duke cituar vendimin e qeverisë izraelite pas ndërprerjes së bisedimeve për armëpushimin me Hamasin.

Por mediat izraelite transmetojnë raporte të ngjashme. Disa cituan imazhe në mediat sociale që tregonin një kamp në ndërtim për palestinezët e Rafahut.

Zyra e kryeministrit Benjamin Netanyahu dhe zyra e zëdhënësit ushtarak izraelit nuk pranuan të komentojnë. /vizionplus.tv