OKB: Hamasi po konsideron propozimin për armëpushim me Izraelin për 40 ditë

Shtatë muaj pas fillimit të luftës shkatërruese në Lindjen e Mesme, Hamasi vazhdon të shqyrtojë, me  “frymë pozitive”, propozimin e fundit për armëpushim me Izraelin në Rripin e Gazës, i cili do të shoqërohet me lirimin e pengjeve izraelitë në këmbim të lirimit të të burgosurve palestinezë në burgjet izraelite, thotë OKB.

Në pritje të përgjigjes së lëvizjes palestineze për çështjen e armëpushimit që është vënë sërish në tryezën e bisedimeve nga vendet ndërmjetësuese, burimet folën sot për sulme të reja ajrore izraelite në sektorin Rafah, në skajin jugor të enklavës, në kufijtë e mbyllur me Egjiptin.

Në të njëjtën kohë, qeveria e Izraelit njoftoi se konfirmoi vdekjen e një pengu izraelit në Gaza, Dror Or, një banor i Kibbutz Beeri, dy nga fëmijët e të cilit, të cilët gjithashtu u rrëmbyen më 7 tetor nga luftëtarët e Hamasit, u liruan në Nëntor, kur u ra dakord për  armëpushim për një javë.

Asokohe armëpushim lejoi lirimin e 105 pengjeve, përfshirë 80 shtetas izraelitë, në këmbim të lirimit të 240 palestinezëve nga Izraeli. Në të dyja anët, ishin kryesisht gra dhe fëmijë. Por që atëherë, përpjekjet e shumta të ndërmjetësve kanë mbetur të pafrytshme.

Udhëheqësi i Hamasit, Ismail Haniya tha se oferta izraelite për një armëpushim 40-ditor po konsiderohet në një “frymë pozitive” gjatë një bisede telefonike me shefin e inteligjencës së Egjiptit, Abbas Kamal.

Kreu i Hamasit, të cilin Izraeli, SHBA-ja dhe BE-ja e cilësojnë si organizatë terroriste, foli gjithashtu me telefon me ministrin e Jashtëm të Katarit, të cilit ai përsëriti synimin e tij për të “arritur një marrëveshje”.

“Ne do të mbrohemi”

“Ne do të bëjmë atë që është e nevojshme për të mposhtur, për të shtypur armikun tonë, duke mos përjashtuar Rafahun,” përsëriti dje zoti Netanyahu, i cili në fillim të kësaj jave tha se operacioni në qytet do të zhvillohet, “me ose pa një marrëveshje » për një armëpushim.

Lufta shpërtheu më 7 tetor, kur një sulm i paprecedentë nga krahu ushtarak i Hamasit në jug të Izraelit vrau 1,170 njerëz, shumica prej tyre civilë, sipas një raporti të AFP-së bazuar në të dhënat zyrtare izraelite.

Mbi 250 persona të tjerë u rrëmbyen dhe u dërguan në enklavën palestineze. Sipas burimeve izraelite, 129 prej tyre mbeten në Rripin e Gazës, por të paktën 35 besohet të jenë të vdekur/vizionplus.tv/