Polonia: Duhet të përgatitemi për një konflikt ushtarak në shkallë të plotë

Shefi i shtabit të forcave të armatosura në Poloni theksoi se vendi duhet të përgatisë ushtarët e tij për një konflikt gjithëpërfshirës dhe rriti numrin e trupave në kufijtë me Rusinë dhe Bjellorusinë.

Marrëdhëniet e Polonisë me Rusinë dhe aleatin e saj Bjellorusinë janë përkeqësuar ndjeshëm që nga shpërthimi i luftës në Ukrainë në 2022.

“Sot ne duhet të përgatisim forcat tona për një konflikt në shkallë të plotë”, tha shefi i shtabit Wislau Kukula gjatë një konference për shtyp.

Gjithashtu zëvendësministri i mbrojtjes Pawel Bejda tha se nga gushti, numri i trupave që ruajnë kufirin lindor të Polonisë do të rritet në 8,000 nga 6,000 që është sot.

Në maj, Polonia njoftoi detajet e “Mburoja Lindore”, një program prej 10 miliardë zloty (2.35 miliardë euro) i cili do të forcojë mbrojtjen përgjatë kufijve të saj me Bjellorusinë dhe Rusinë, të cilin planifikon ta përfundojë deri në vitin 2028.

Kufiri me Bjellorusinë ka qenë një pikë zjarri që kur emigrantët filluan të dynden atje në vitin 2021, pasi Bjellorusia hapi agjencitë e udhëtimit në Lindjen e Mesme duke ofruar një rrugë të re jozyrtare për në Evropë, një lëvizje që Bashkimi Evropian tha se kishte për qëllim krijimin e një krize.

Varshava ka rritur shpenzimet e saj të mbrojtjes në më shumë se 4% të PBB-së këtë vit në përgjigje të pushtimit rus të Ukrainës./vizionplus.tv