Rusia mori 2.9 miliardë dollarë pajisje perëndimore pavarësisht sanksioneve

Kompanitë perëndimore furnizuan Rusinë me komponentë në vlerë 2.9 miliardë dollarë që mund të përdoren për të prodhuar pajisje ushtarake në 10 muajt e parë të 2023, pavarësisht sanksioneve kundër Moskës, tha sot zyra e presidentit ukrainas.

Kievi po ushtron presion ndaj aleatëve të tij që të ashpërsojnë sanksionet kundër Rusisë dhe të mbyllin çdo boshllëk në kontrollet e eksporteve, duke thënë se Moska vazhdon të jetë në gjendje të importojë materiale dhe komponentë ushtarakë për luftën e saj në Ukrainë.

Importet ruse të pajisjeve ushtarake arritën në 90% të niveleve të regjistruara përpara se trupat ruse të pushtonin Ukrainën në shkurt 2022, tha zyra e Presidentit Volodymyr Zelensky.

Zyra e presidentit ukrainas citoi një hetim nga një grup pune i udhëhequr nga shefi i shtabit të Zelenskyit, Andriy Yermak dhe Michael McFaul, ish-ambasadori i SHBA-së në Moskë. Hetimi u fokusua në përpjekjet ruse për të anashkaluar sanksionet për eksportin e pajisjeve ushtarake.

“Produktet e 250 ose më shumë kompanive perëndimore u gjetën në mostrat e armëve ruse të dëmtuara ose të konfiskuara”, tha zyra e Zelensky.

Shkolla Ekonomike e Kievit, e cila mori pjesë në hetim, tha se rreth 2,800 komponentë të huaj u gjetën në pajisjet ushtarake ruse, si raketat hipersonike “Kinzhal” që Moska përdor për sulmet ajrore në Ukrainë.

“Në fakt, 95% e të gjithë komponentëve të gjetur në armët ruse në fushën e betejës erdhën nga prodhuesit në vendet aleate, me vetëm 72% nga kompanitë me bazë në SHBA”, thuhet në raport. /vizionplus.tv