“800 raste në bote, dy të shpirtit tim”, Emanuela Pepkola: Beteja me sëmundjen e rrallë i mori jetën shoqes time

Emanuela Pepkola, themeluesja e Sindrom Down Albania, ka rrëfyer në “Quo Vadis” në Vizion Plus të moderuar nga Pranvera Borakaj, një histori të trishtë të jetës së saj.

Ajo ka treguar se shoqja e saj e ngushtë ka ndërruar jetë nga e njëjta sëmundje që është prekur djali i saj.

Sipas Emanuelës fati i mirë i djalit të saj është se u diagnostikua në moshë të vogël, ndërsa shoqja e saj nuk e pati këtë mundësi.

Pjesë nga biseda:  

Emanuela: Kam bashkëjetuar në fillim me shoqen time të ngushtë, Armandën e cila nuk jeton më, në Bllok. Ajo kishte rrogë më të mrië se unë, ajo më mbante praktikisht.

Pranvera Borakaj: Kishit ardhur të dyja nga Turqia?

Emanuela: Jo, unë Armandën e kam njohur pasi jam kthyer nga Turqia, sa isha ndarë nga i dashuri i Atëhershëm. Këtu shkruan Amka ime.

Pranvera Borakaj: Kur e keni bërë si tatuazh?

Emanuela: Kur Ami ndërroi jetë. Ne kemi qenë 4 shoqe dhe të katërta e kemi këtë si tatuazh. Ami për mua është motër. Armanda ka ndërruar jetë nga e njëjta diagnozë që ka edhe Arbi, por fati i keq i Armandës është se e zbuloi rreth moshës 35-vjeçare, ndërsa Arbi është në kohë, pasi u diagnostikua 4-vjeç. Thashë se kjo është e rrallë, në formën siç e ka Arbi apo Armanda, janë 800 njerëz në botë, dhe dy janë njerëz të shpirtit tim. Unë e quaj veten nëna e probalitetit, pasi kam lindur Arbin, por edhe se shumë gjëra në jetë o më prishen o më rregullohen në çastet e fundit./vizionplus.tv