Arti në Zi! Humb jetën kompozitori dhe studiuesi Edmond Buharaja

Kompozitori, muzikologu dhe profesori i njohur Edmond Buharaja ka humbur jetën ditën e sotme.

Buharaja do të kujtohet si një studiues dhe kompozitor i përmasave botërore.

Lajmin e ndarjes nga jeta të muzikantit e ka bërë të ditur profesori Vasil Tole.

Postimi i Vasil Tole:

 Ndahet nga jeta kompozitori dhe muzikologu Edmond Buharaja

Edmond Buharaja, miku, shoku, kolegu, kompozitori, muzikologu, pedagogu, intelektuali i artit na la. Iku befas, si heshtja qē vjen pas akordit të fundit vertikal që mbyll me një goditje të vetme tragjike kohët e simfonive.

Ishte shpejt për ty i dashur Edi, shumë shpejt, tē shkoje matanë, në atë botën që nuk është as tonale, as atonale, por që është thjesht bota pa tinguj, që ti i njihje më mirē se gjithkush.

Studiove kompozicion në ILA nën drejtimin e dajës tënd të shquar, kompozitorit Feim Ibrahimi. Ishim që të dy në një klasë. Të pashë si shkëlqeve si student në të gjitha aspektet. Punoje pa fund e pa orare, se të mëdha i kishe synimet. “Simfonia Alpine” ishte punimi yt i diplomës, një vepër mbi motivet e Kadaresë që na tregoi se doje të ngjiteshe lart.

Në filim të viteve 1990, more pjesë së bashku me një grup kompozitorësh të rinj, në aktivitetet e para që synonin një realitet pluralist muzikor në Shqipëri.”Metamorfoza e kristalit”, vepra jote për harqe e shkruar në ato vite, solli një muzikë që qendronte mbi tekstura dhe struktura formale pa censurë, si shprehje e lirisë krijuese. 

U ktheve pas shumë vitesh në Shqipëri si pedagog në Universitetin e Arteve, duke futur në programet shkollore lëndë të tilla të domosdoshme si Semiotika e muzikës. Vijove mësimdhënien dhe aktivitetin muzikologjik edhe në Kosovë e Maqedoninë e Veriut. Mbrojte doktoratën në muzikë në vitin 2016, me temën “Historiografia e shprehjes muzikore në Shqipëri dhe diasporë: Nga prania njerëzore në tokën shqiptare deri në shek. XVI”, një punim sfidues dhe pionier ne kete temë. Vazhdove botimet, një ndër to kushtuar NIKETËS SË RAMESIANËS, kompozitorit arbër të liturgjisë, i cili u botua nga Akademia e Shkencave etj. Paralelisht shkruaje muzikê dhe drejtoje edhe studentë në kompozim dhe merrje pjesë aktive në tribunat kushtuar muzikës në Shqipëri dhe jashtë saj. Planet i kishe për të punuar edhe 100 vite të tjera. Së fundi ishe emëruar si shef i departamentit të kompozicionit, muzikologjise dhe dirizhimit në Fakultetin e Muzikës, në UART, një detyrë që padyshim do ta kryeje me arritje të tjera.

Por ja, metronomi i jetës ndaloi dhunshëm.

Prehu i qetë mik i dashur, se le pas një jetë dhe një vepër që do të mbajë gjallë emrin tënd dhe mbiemrin e madh Buharaja, si stërnip i Vexhi Buharasë që ishe!

Ngushëllime Elmira dhe familja!

Ngushëllime për miqtë e Edit dhe për kolegët e Fakultetit të Muzikës në UART!

Lamtumirë shok e mik i shtrenjtë!