Macron njofton ndihmën 100 mln euro për Libanin, bën thirrje për armëpushim

Presidenti francez Emmanuel Macron njoftoi se Franca do t’i japë një paketë ndihme prej 100 milionë eurosh për Libanin, duke folur në Konferencën Ndërkombëtare në Mbështetje të Popullit dhe Sovranitetit Libanez në Paris.

“Kombet e Bashkuara kanë apeluar për të mbledhur 426 milionë euro. Franca do të japë 100 milionë euro gjatë kësaj konference. Ajo që nevojitet është thjesht të strehojë familjet, të ushqejë fëmijët, të kujdeset për të plagosurit dhe të vazhdojë të sigurojë shkollë për studentët”, tha Macron.

Presidenti francez bëri thirrje gjithashtu për një armëpushim midis Hezbollahut dhe Izraelit.

“Ne kemi nevojë për një armëpushim në Liban. Më shumë dëme, më shumë viktima, më shumë sulme nuk do t’i japin fund terrorizmit ose do t’i mbajnë të gjithë të sigurt. Më vjen keq që Irani ka angazhuar Hezbollahun kundër Izraelit, ndërsa interesi më i lartë i Libanit kërkonte që ata të qëndronin jashtë luftës së Gazës. Më vjen keq që Izraeli vazhdon operacionet e tij ushtarake në Liban, Jug, Bejrut dhe gjetkë dhe që numri i viktimave civile vazhdon të rritet”, vazhdoi Macron.

Më shumë se 50 vende, si dhe Kombet e Bashkuara dhe Bashkimi Evropian, po marrin pjesë në nivel ministror në konferencën, e cila u mblodh me iniciativën e presidentit francez. Izraeli nuk merr pjesë. /vizionplus.tv