Shantazhet në rrjetet sociale, Balla: Po punojmë për ndryshimet ligjore kundër dhunës online

Ministri i Brendshëm Taulant Balla, ka reagua pas një tjetër rasti të shantazhit në rrjetet sociale.

Përmes një postimi në Facebook, Balla thekson se Policia e Shtetit në bashkëpunim me Sektorin për Hetimin e Krimeve Kibernetike, po punojnë të të evidentuar çdo rast shantazhi dhe dhunë përmes rrjeteve sociale.

Sipas tij po punohet për ndryshimet ligjore  kundër dhunës online, ndërsa ofruesit e rrjeteve sociale po përmirësojnë nivelin e moderimit të mesazheve në gjuhën shqipe.

Postimi i Ballës:

Ngjarjet e fundit kanë rritur nevojën për të rritur vigjilencën kundër dhunës, shantazheve e gjuhës së urrejtjes online. Policia e Shtetit përmes Sektorit për Hetimin e Krimeve Kibernetike📍Tiranë, në bashkëpunim me Prokurorinë e Juridiksionit të Përgjithshëm kanë identifikuar një tjetër rast shantazhi në rrjetet sociale me rrezikshmëri ndaj një minoreneje.

Po bashkëpunojmë me agjencitë partnere për fuqizimin e kapaciteteve tona në përballjen me këtë formë kriminaliteti.  Policia e Shtetit po rrit vigjilencën dhe forcën parandaluese, është i domosdoshëm bashkëpunimi me publikun, të cilët duhet të drejtohen pa hezitim duke kallëzuar çdo rast shantazhi e dhune përmes rrjeteve sociale, për të na dhënë mundësinë e reagimit në kohë. Në momentin më të parë të konstatimit duhet denoncuar dhe jo të bini pre e shantazhit!

Paralelisht po punojmë për ndryshimet ligjore  kundër dhunës online, ndërsa ofruesit e rrjeteve sociale po përmirësojnë nivelin e moderimit të mesazheve në gjuhën shqipe.

#ThuajJoDhunësOnLine⛔️

/Vizionplus.tv /