Sot zgjedhjet në universitete, votohet për rektorët dhe dekanët e rinj, akuza për parregullsi në Shkodër

Këtë të premte po mbahen zgjedhjet për drejtuesit e rinj të 12 Universiteteve publike, ku 6500 pedagogë dhe 88 mijë studentë po votojnë për drejtuesit e rinj.

Deri më tani procesi nuk është shoqëruar nga incidente, përveçse në universitetin e Shkodrës ku kandidati për rektor, Tonin Gjuraj, hodhi akuza për parregullsi të procesit zgjedhor.

“Në dukje procesi duket normal, megjithatë unë jam në këtë garë i disavantazhuar. Është cenuar integriteti i kësaj gare, jam në një situatë të pabarabartë për arsye shumë të thjeshta. Ligji 80/2015 pranon kandidatin për rektor nga jashtë institucionit dhe nga ana tjetër ky komision institucional i zgjedhjeve nuk më lejon mua të kem vëzhgues nga jashtë institucionit. Kanë refuzuar çdo kërkesë timen në mënyrë permanente”, tha ai.  

Në pjesën më të madhe të këtyre institucioneve, veçanërisht në Universitetet e Tiranës interesi është më i madh.

Nga ana tjetër mbetet shqetësim për këto universitete fakti se një pjesë e kandidatëve që garojnë për rektor apo dekan janë denoncuar në media për plagjiaturë.

Zgjedhjet nisën në orën 08.00 dhe do të përfundojnë në orën 16.00./vizionplus.tv