Vodhi para dhe sende me vlerë në banesën ku punonte, arrestohet sanitarja dhe bashkëpunëtori, shpallet në kërkim një tjetër

Një 33-vjeçare është arrestuar nga policia në Durrës paraditen e kësaj të diele.

E reja ka shfrytëzuar punën si sanitare në një shtëpi në qytetin bregdetar për të grabitur sende me vlerë, para dhe bizhuteri.

33-vjeçarja ka bashkëpunuar me 2 shtetas të tjerë, të cilët ishin vëllezër me njëri-tjetrin për të vjedhur në banesë.

Ajo u kishte siguruar atyre kopje të çelësit të shtëpisë.

Sipas njoftimit zyrtar, policia ka arrestuar njërin nga vëllezërit, ndërsa tjetri është shpallur në kërkim.

Njoftimi i Plotë:

Strukturat Hetimore të Komisariatit të Policisë  Durrës, pas marrjes së kallzimit nga shtetasi Sh. Gj., 59 vjeç, banues në lagjen nr. 18 Durrës, se në banesë i kishin vjedhur pa thyerje dyshohet nëpërmjet çelësit të derës, një shumë parash dhe bizhuterisht, menjëherë kanë organizuar punën për zbardhjen e këtij rasti.

Falë veprimeve të shpejta hetimore dhe profesionale, në bashkëpunim me Prokurorinë  është bërë e mundur zbardhja e ngjarjes, mekanizmi i vjedhjes dhe identifikimi i autorëve të dyshuar.

Në vijim të veprimeve në kuadër të operacionit policor të koduar “Kopja”  është bërë arrestimi në flagrancë i shtetasve:

F.H., 42 vjeç, banues në lagjen nr. 13 Durrës dhe  E.K, 33 vjeçe, banuese në lagjen nr. 11, Durrës.

Si dhe u  shpall në kërkim shtetasi A. H., 36 vjeç, banues në lagjen nr.13, Durrës, ku vijon puna për kapjen e  tij.

Nga veprimet profesionale hetimore disa ditore, bazuar dhe në inteligjencën policore, kqyerjen e kamerave dhe veprimeve të tjera proaktive,  dyshohet  se shtetasja E. K., duke qenë se punonte si sanitare në banesën e shtetasit Sh.Gj,  ka siguruar kopje të çelsit të banesës  dhe ua ka dhënë vëllezërve E. H dhe A. H., si dhe i ka informuar për mos prezencën e familjarëve në banesë.

Në cilësinë e provës materiale Policia ka gjetur dhe sekuestruar gjatë kontrollit në banesën e shtetasit F.H, një varëse dhe një unazë floriri, një shumë parash dhe një automjet që dyshohet se e kanë përdorur gjatë kryerjes së vjedhjes.

Materialet procedurale i kaluan  Prokurorisë pranë Gjykatës së Shkallës së Parë në Juridiksionin e Përgjithshëm Durrës për veprime të mëtejshme. /vizionplus.tv