10-vjeçarja alarmoi policinë në Tiranë, iku nga shkolla pa njoftuar askënd, ku e gjetën prindërit

Një vajzë 10-vjeçare ka alarmuar policinë e Tiranës ditën e sotme. E mitura ishte larguar nga shkolla në Fresk pa dijeninë e stafit arsimor dhe të prindërve.

Pa asnjë dijeni për vajzën e tyre prindërit kanë denoncuar në polici zhdukjen e saj. Menjëherë ka nisur puna për gjetjen e saj dhe në fund vajza është gjetur në shtëpinë e gjyshërve të saj në zonën e Laprakës.

10-vjeçarja ka deklaruar se është larguar me dëshirë nga shkolla.

Njoftimi:

Ditën e sotme, rreth orës 14:50, është marrë njoftim se një nxënëse 10 vjeçe, që frekuenton një shkollë në zonën e Freskut, është larguar nga ambientet e shkollës pa dijeninë e prindërve dhe stafit të shkollës dhe nuk dihej vendndodhja e saj.

Shërbimet e Komisariatit të Policisë Nr. 4 pas marrjes së njoftimit janë angazhuar maksimalisht për gjetjen e saj me anë të shërbimeve të terrenit dhe duke këqyrur kamerat e sigurisë të bizneseve përreth shkollës.

Pas kryerjes së verifikimeve në terren është bërë lokalizimi i 10-vjeçares, e cila është gjetur në banesën e gjyshërve të saj, në zonën e Laprakës.

E mitura është intervistuar në prani në prindërve dhe psikologëve dhe gjatë intervistimit ka deklaruar se është larguar nga shkolla me dëshirë.