Berisha mbetet “non grata” në Britani, Basha i përgjigjet akuzave të kreut të PD: Je në një kamp me Ramën

Kryetari i Partisë Demokratike, Sali Berisha humbi gjyqin kundër qeverisë angleze dhe mbetet “non grata” në Britaninë e Madhe.

Menjëherë pas vendimit, reagoi Partia Demokratike dhe akuzoi SIAC (Komisionin e Posaçëm të Apelimit për Migracionin) se “nuk ka hetuar zbulimin e të vërtetës dhe vendimi i Sekretares është marrë në bazë të artikujve të mediave të sponsorizuar nga Soros dhe deklaratave të kundërshtarëve të politikë Rama, Basha, Veliaj.”

Lexo edhe :

Related Posts

Por Lulzim Basha, përmes një reagimi në Facebook thotë se pas vendimit të Apelit për vulën e PD, u faktua se Berisha është në të njëjtin kamp me Ramën.

Basha thekson se shqiptarët nuk meritojnë një opozitë të mbyllur në ankthin e interesave personale të një individi (Berishës), i cili i bën fresk qeverisë vetëm për hallin e tij.

Lulzim Basha: Në vend që të sqarojë demokratët për pengimin që po i bën opozitës për interesa thellësisht personale, Berisha ngre pretendime imagjinare ndaj meje pas humbjes së gjyqit për heqjen e “Non gratës” nga Britania e Madhe.

Për çdo shqiptar sot është e qartë, dhe u faktua edhe me vendimin e paligjshëm për Partinë Demokratike, se Sali Berisha është në të njëjtin pazar me Edi Ramën, siç ishte me ndryshimet kushtetuese të 2008-ës.

Sali Berishës i duhet vula për të përdorur demokratët si mburojë për hallet e tij dhe familjes së tij; Edi Ramës pushteti për t’u mbrojtur nga i njëjti fat si paraardhësi i tij.

Përrallave të Sali Berishës u ka dalë boja prej tre vitesh. Përmes tyre mban peng Partinë Demokratike për hallin e tij personal, duke vazhduar pazarin e vjetër me Ramën, për të mbajtur status quo-në.

Rruga pa krye ku ka futur veten dhe demokratët është sot e vetmja arsye pse qeveria më e korruptuar në Europë qëndron në këmbë.

Pengimi i ndryshimit, pengimi i Reformës Zgjedhore, sulmet ndaj SPAK, amnistimi i të korruptuarve, pazari për vulën, janë prova të qarta të bashkëpunimit Rama-Berisha, për interesat e tyre, kundër interesave të shqiptarëve.

Shqiptarët nuk meritojnë një opozitë të mbyllur në ankthin e interesave personale të një individi, i cili sot i bën fresk qeverisë vetëm për hallin e tij.

Qeveria më e korruptuar në Europë meriton të ketë përballë alternativën që u ofron shqiptarëve ndryshim.

Loja hilacake mes Ramës dhe Berishës për të mbrojtur gjendjen e mjerueshme në të cilën ndodhet ekonomia, politika dhe demokracia shqiptare, duhet dhe do të marrë fund.

Shqiptarët meritojnë më shumë!/vizionplus.tv