Izraeli e dinte planin e Hamasit për sulmin e 7 tetorit, skenari për të cilin ishte përgatitur

Inteligjenca ushtarake izraelite ishte në dijeni më shumë se dy javë përpara sulmeve të 7 tetorit për një sulm të planifikuar të Hamasit, madje edhe për planin e rrëmbimit të pengjeve, raportoi transmetuesi publik Kan.

Njësia e mbikëqyrjes dhe grumbullimit të inteligjencës së ushtrisë izraelite, Njësia 8200, prodhoi një raport më 19 shtator, duke detajuar trajnimin e njësive elitare të Hamasit në përgatitje për këto sulme.

Zyrtarët e inteligjencës brenda komandës ushtarake jugore të Izraelit, që përfshin Rripin e Gazës, ishin në dijeni të raportit, por e injoruan atë, sipas Kan, i cili citoi zyrtarë të paidentifikuar të sigurisë.

Sipas informacioneve të Kan, një dokument i shpërndarë më 19 shtator në Divizionin 143 Chahal , i njohur gjithashtu si Divizioni i Gazës, informonte për një plan për të sulmuar bazat ushtarake dhe për të marrë deri në 250 pengje, duke përfshirë gra dhe fëmijë.

Skenari më i keq i mundshëm i konsideruar në atë kohë ishte hyrja e mundshme e disa dhjetëra anëtarëve të Hamasit nga tre pika në territorin izraelit.

Por më 7 tetor, sulmet e komandove të Hamasit dhe organizatave të tjera simotra të armatosura palestineze në Izrael shkaktuan vdekjen e 1,194 personave, shumica prej tyre shtetas izraelitë, dhe rrëmbimin e 251 personave. Nga 116 pengjet e mbetura në Gaza, 41 janë të vdekur, sipas ushtrisë izraelite.

Kryeministri izraelit Benjamin Netanyahu ka refuzuar me vendosmëri të zhvillojë një hetim zyrtar për sulmet e 7 tetorit përpara përfundimit të luftës në Gaza.