Ukraina zmbraps sulmin ajror rus në rajonin e Kievit, rrëzohen 10 dronë

Sistemet e mbrojtjes ajrore në afërsi të kryeqytetit ukrainas u aktivizuan për të zmbrapsur një sulm me dron rus, njoftoi komanda ushtarake rajonale e Kievit në orët e para të mëngjesit.

të paktën 10 dronë rusë u rrëzuan ndërsa po shkonin drejt zonës, konfirmoi përmes Telegramit Serhii Popko, guvernatori ushtarak i Kievit.

Ai shtoi se detajet më të plota të shtrirjes së inkursionit të ri rus do të publikohen më vonë sot.

Më herët, presidenti ukrainas Volodymyr Zelensky tha se ushtria po përparonte në rajonin Kursk të Rusisë dhe kishte pushtuar dy fshatra, më shumë se dy javë pas fillimit të ofensivës ukrainase.

“Sapo fola me shefin e shtabit të përgjithshëm të mbrojtjes kombëtare, Oleksandr Shirsky, dhe trupat tona po përparojnë në rajonin e Kurskut. Nga një deri në tre kilometra. Ne kemi marrë nën kontroll edhe dy fshatra të tjerë”, tha Zelensky në mesazhin e tij të përditshëm. duke shtuar se luftimet “vazhdojnë në një fshat tjetër”.

Kievi thotë se Bjellorusia po grumbullon trupa në kufi

Ukraina akuzoi sot Bjellorusinë, fqinjin e saj dhe aleatin e ngushtë të Rusisë, për grumbullim të trupave në kufirin e saj dhe paralajmëroi Minskun për çdo “veprim jomiqësor”.

“Ne paralajmërojmë zyrtarët bjellorusë që të mos bëjnë një gabim tragjik nën presionin e Moskës dhe u bëjmë thirrje forcave të saj të armatosura të ndalojnë veprimet jomiqësore dhe të tërheqin forcat nga kufijtë e Ukrainës”, shtoi diplomacia ukrainase në një deklaratë.

Kievi tha se kishte zbuluar praninë e luftëtarëve të milicisë Ëagner, disa prej të cilëve po strehohen në Bjellorusi pas rebelimit të dështuar të liderit të tyre vitin e kaluar.

Ukraina ka paralajmëruar se stërvitjet ushtarake në rajonin kufitar përbëjnë një kërcënim për “sigurinë globale” për shkak të afërsisë së saj me termocentralin bërthamor të Çernobilit, vendi i fatkeqësisë më të madhe bërthamore në botë.

“Ne theksojmë se Ukraina nuk ka ndërmarrë dhe nuk do të ndërmarrë kurrë veprime jomiqësore kundër popullit bjellorus”, shtoi ministria e Jashtme.

Njoftimi vjen pasi Ukraina ka nisur një ofensivë që nga 6 gushti me mijëra trupa të saj kundër rajonit kufitar rus të Kursk, duke pushtuar disa qindra kilometra katrorë, dhe ndërsa Rusia vazhdon përparimin e saj në Ukrainën lindore.

Bjellorusia, e cila është politikisht dhe ekonomikisht e varur nga Rusia, është qeverisur nga presidenti Alexander Lukashenko që nga viti 1994. Në vitin 2022, Lukashenko lejoi që trupat ruse të vendoseshin në Bjellorusi gjatë asaj që Moska dhe Minsk i quanin “stërvitje përpara pushtimit rus të Ukrainës”./vizionplus.tv