Ancelotti: Jam i sigurt që Mbappe do të rikthehet në formën më të mirë

Humbja ndaj Barcelonës, më pas disfatë nga Milani – situata në Real Madrid është alarmante, ndaj edhe Carlo Ancelotti nuk e fsheh se kampionët aktual të Spanjës dhe Evropës nuk janë në formën më të mirë.

Reali pëson shumë gola, në katër ndeshjet e fundit rrjeta është tundur deri në 10 herë, por tifozët janë veçanërisht të interesuar për formën e Kylian Mbappe.

Francezi nuk e ka gjetur ende rrugën në Madrid, por Ancelotti është gati të mbrojë nga të gjitha “goditjet” një prej sulmuesve më të mirë në botë.

“Mbappe po stërvitet mirë, por po kalon një periudhë të vështirë. Si të gjithë ne, në fund të fundit. Nëse jemi të zgjuar, mund ta kthejmë situatën, por duhet të jemi të fokusuar dhe të kemi qëndrimin e duhur. Ai nuk është në gjendje të na ofrojë versionin më të mirë të vetes, por jam i bindur se do ta kthejë situatën”, tha Ancelotti. /vizionplus.tv