Guvernatori Sejko jep llogari në Kuvend për skandalin  e kredive, sherr mes deputetëve

Guvernatori i Bankës së Shqipërisë Gent Sejko është duke dhënë llogari në Kuvend, te Komisioni i Ekonomisë në lidhje me skandalin e kredive, të cilat kanë prekur rreth 100 mijë familje shqiptare.

Më herët, Banka e Shqipëriaë ka theksuar se nuk kishin bërë bllokimin e menjëhershëm të aktivitetit të MCA pasi kështu do të dilte jashtë kontrollit të BSH dhe nuk do të raportonte në regjistrin e kredive, ndërsa sot shpjegoi se janë kryer kontrolle periodike duke ulur interesat e kredive me tre herë.

“Subjektet financiare që japin mikrokredi iu janë nënshtruar të gjitha kontrolleve. Revokimi i licensës është masa e fundit që mund të marrë Banka e Shqipërisë. Kjo mund të sjellë pasoja edhe për klientët. Banka e Shqipërisë nuk mund të ndërhyjë as në marrëdhëniet që ka MCA me kontraktorët e tjerë. Problemi me MCA është se të gjitha palët tashmë iu drejtohen gjykatave. Qytetarët duhet të paguajnë detyrimet që kanë.

Problemi në lidhje me normën e interesit ka të bëjë me mikro-kreditë. Kemi bërë inspektime dhe normat e interesit janë ulur me tre herë. Kemi qenë në nivelet e mbi 200 përqind e jemi tek 50-60 përqind, në qershor do kemi shifrën e re të përditësuar. Kemi marrë edhe masa, që detyrimi për klientët mos të jetë më tepër se 30 përqind e shumës së marrë si kredi”, tha Sejko, ndërkohë që raportimi është shoqëruar me debate të forta mes deputetëve. 

Kreu i Komisionit të Ekonomisë, Eduart Shalsi përjashtoi nga mbledhja deputetin Agron Shehaj pas debateve gjatë mbledhjes.

Në debat e sipër, Shalsi iu drejtua Shehajt duke thënë se nuk ësghtë “te mëhalla e tij politike”, ndërsa Shehaj tha se përjashtimi i tij po bëhej, sepse Shalsit nuk i pëlqyen pyetjet. /vizionplus.tv