Kancelari gjerman njofton deportimin e shpejtë të emigrantëve kriminelë

Deportimi i shpejtë i kriminelëve edhe në Siri dhe Afganistan u njoftua pak kohë më parë nga kancelari Olaf Scholz, nën hijen e sulmit vrasës të javës së kaluar nga afgani Sulaiman Ataee në Mannheim, i cili rezultoi në vdekjen e një oficeri policie dhe plagosjen e pesë të tjerëve. Scholz bëri thirrje gjithashtu për dëbimin e “atyre që lavdërojnë aktet terroriste”.

“Sulmi në Mannheim u krye nga një islamist ekstremist. Terrorizmi dëshiron të na imponojë botëkuptimin e tij, por shteti do të mbrohet”, theksoi kancelari nga foltorja e Bundestagut.

“Këtu nuk vlen ligji i më të fortëve. Këtu shteti është përgjegjës për ligjin dhe kushdo që përfiton nga mbrojtja jonë, e humbet atë mbrojtje dhe do të përballet me zero tolerancë”, shtoi ai.

Madje ai sqaroi se “kriminelët duhet të deportohen, edhe nëse vijnë nga Siria dhe Afganistani”. Por kushdo që lavdëron terrorizmin duhet gjithashtu të deportohet, shtoi ai, duke iu referuar përdoruesve të mediave sociale që ditët e mëparshme lavdëruan hapur sulmin e 25-vjeçarit afgan. /vizionplus.tv